د پښتونخوا په صوابۍ کې یوه پلار اول خپل څلور اولادونه وژلي او بیا یې پخپله ځان وژنه کړې
د پښتونخوا په صوابۍ کې یوه پلار له مېرمنې سره تر جنجال وروسته لومړی له خپلو څلورو اولادونو د چړې په وسیله سرونه پرې کړي او وروسته یې پخپله هم ځان وژنه کړې ده.
د پښتونخوا په صوابۍ کې یوه پلار له مېرمنې سره تر جنجال وروسته لومړی له خپلو څلورو اولادونو د چړې په وسیله سرونه پرې کړي او وروسته یې پخپله هم ځان وژنه کړې ده.
خواله رسنیو کې د دې پېښې ویډیو هم خپره شوې چې خلکو ورته پراخ غبرګون ښودلی دی.
د پښتونخوا د صوابۍ ولسوالۍ پولیس وايي، چې نن ددې ولسوالۍ د یار حسین سړې چیینې په سیمه کې یوه پلار لومړی خپل څلور اولادونه وژلي او وروسته یې خپله هم ځانه وژنه کړي ده.
ځايي پولیسو د پیښې انګیزه کورنۍ ستونزي بللې دي او وايي، چې د ماشومانو پلار د خپلو اولادونو مرۍ د چړې په وسیله پرې کړې او هغوی یې وژلي دي.
ځايي پولیسو ویلي، چې په وژل شویو ماشومانو کې دوه هلکان او دوې نجونې دي.
د دغو وژل شویو ماشومانو عمرنه ۱۲، ۱۰، ۸، او دوه کلن ښودل شوي دي.
همدارنګه پولیسو رسنیو ته ویلي، چې د دې پېښي پرمهال د ماشومانو مور په کور کې نه وه او له خاوند سره تر لانجې وروسته د خپلې مور کور ته تللي وه.
د طالبانو د کډوالو او بېرته راستنیدونکو چارو وزارت ويلي، چې په پاکستان کې ۶۳ تنه افغان بندیان د سلواغې پر ۲۴مه نېټه له بنده خوشې او افغانستان ته ستانه کړل شوي. ویل کیږي، چې په دغو بندیانو کې ۱۵ تنه د څلورو کورنیو غړي او پاتې یې ځانته کسان وو.
دغه وزارت وايي، یاد بندیان پاکستان کې له دوو تر شپږو ورځو بندیان وو، او تېره ورځ افغانستان ته ستانه کړل شوي دي.
د طالبانو د کډوالو او بېرته راستنېدونکو چارو وزارت نن پنجشنبه د (سلواغې ۲۵مه) د یوې خبرپاڼې په خپرولو سره ویلي، چې د پاکستان له بیلابیلو زندانونو ۶۳ افغان بندیان خوشې شوې چې ښځې او ماشومان هم په کې دي.
د طالبانو کډوالو وزارت د ننګرهار د تورخم او کندهار سپین بولدک سرحدي امریتونو په حواله ویلي، چې دغه کسان د قانوني اسنادو د نه لرلو له امله د پاکستان په بېلابېلو سیمو کې نیول شوي وو.
د طالبانو په خبرپاڼه کې راغلي، چې دغه افغان کډوال له دوو تر شپږو ورځو پورې په بند کې وو، چې هېواد ته په راستنېدو سره خپلو سیمو ته لېږدول شوي او په دې سربېره د همکارو بنسټونو له لوري ورسره بشري مرستې هم شوې دي.
تر دې وړاندې هم طالبانو له پاکستان څخه د سلګونو افغان بندیانو له خوشې کېدو خبر ورکړی و.
ملګرو ملتونو په خپل وروستي راپور کې ویلي، چې یوازې د ۲۰۲۵ کال په جنورۍ میاشت کې له پاکستان څخه ۱۸ زره او ۳۰۰ افغانان پولیسو نیولي او په وزر یې افغانستان ته ستانه کړي دي.
د ملګرو ملتونو راپور کاږي، چې پاکستان د ۲۰۲۳ کال له سپتمبر راهیسې له دغه هېواده تر ۸۲۵،۶۰۰ ډېر افغان وګړي افغانستان ته ستانه کړي دي.
د ملګرو ملتونو د کډوالو عالي کمېشنرۍ له پاکستاني چارواکو غوښتي، چې د افغان کډوالو خپلسرې نیونې او جبري اېستل دې ودروي.
په پاکستان کې ډېری دغه افغانان درېیمو هېوادونو ته د تګ تکل لري او د ویزو ترلاسه کولو په تمه دي.
د پاکستان تحریک انصاف ګوند په یوې خپره شوې خبرپاڼه کې راغلي، چې د پاکستان قامي اسمبلۍ غړی شېر افضل مروت له دغه ګونده اېستل شوی دی. د پاکستان تحریک انصاف ګوند ویلي، چې نوموړی د دغه ګوند له ټاکلو اصولو د سرغړاوي له امله له ګونده ایستل شوی.
دغه خبرپاڼه چې تېره شپه (د سلواغې په ۲۵مه نېټه) خپره شوې په کې راغلي، چې شېر افضل مروت د تحریک انصاف ګوند د بنسټ اېښودونکي عمران خان په لارښوونه له ګوند څخه اېستل شوی دی.
وړم سهار پي ټي ای پرېکړه کړې وه، چې د پاکستان قومي اسمبلۍ غړی شېر افضل مروت له ګونده وباسي.
د پاکستان تحریک انصاف ګوند شېر افضل مروت له ګوند څخه اېستلی دی او د تحریک انصاف عمومي منشي فردوس شمیم نقوي د هغه د اېستلو په اړه یو بیان خپور کړی دی.
په پاکستان کې بیا سرچینې وایي، چې تر دې وړاندې د تحریک انصاف بنسټ اېښودونکي عمران خان د ګوند مشرتابه ته لارښوونه کړې وه چې د شېر افضل مروت پر وړاندې پرېکنده اقدام وکړي.
سرچینو ویلي، چې شېر افضل مروت د تحریک انصاف له مقرراتو د پرله پسې سرغړونو له امله له ګونده اېستل شوی.
هغه ته تر دې وړاندې هم څو ځلې د ګوند پر ضد له هر ډول څرګندونو څخه د لاس اخیستلو خبرداری وکړل شوی و.
د سرچینو په وینا، د ګوند مشرانو د تحریک انصاف بنسټ اېښودونکي ته د صوابۍ په جلسه کې د شېر افضل مروت په اړه شکایت کړی و.
تازه شېر افضل مروت پر اېکس پاڼه کاږلي: «زما سره د تحریک انصاف هغو کسانو ظلم کړی، چې له پیله یې زما سره جوړه نه وه. زه د داسې خلکو سره د شخړې اراده نه لرم. زما یوازینۍ ګناه دا ده، چې ما هیڅکله په ګوند کې د کومې ډلې ملاتړ نه دی کړی. زه به هیڅکله د خان صاحب د نظریاتو سره مخالفت ونه کړم او هغه به تل زما مشر وي.»
د پاکستان تحریک انصاف ګوند بنسټ اېښودونکی او د پاکستان پخوانی لومړی وزیر عمران خان دا مهال د پاکستان حکومت له لوري بندي دی.
د پاکستان بهرنیو چارو وزارت د سې شنبې په ورځ د یوې خبرپاڼې په خپرولو سره د لیبیا په ساحل کې د یوې کښتۍ د ټکر په پېښه کې د ۱۶ پاکستاني وګړو د مړینې خبر ورکړی او ویلي دي چې لږ تر لږه ۱۰پاکستانیان لا هم ورک دي.
پاکستان وروسته له هغه دغه خبر تایید کړ، چې په طرابلس کې د پاکستان د سفارت یوې ډلې زاویه ښار ته سفر وکړ ترڅو د سیمه ییزو چارواکو او روغتون له کارکونکو دغه جزیات تایید کړي.
د نا تایید شویو راپورونو په حواله، د بهرنیو چارو وزارت وویل، ګومان کیږي چې ټولټال ۶۳ پاکستانیان په کښتۍ کې سپاره وو.
یاد وزارت د مړو شوو وګړو د نوملړ په خپرولو سره ویلي چې تر اوسه پورې، د ۱۶ کسانو جسدونه موندل شوي، چې ډیری یې د پښنتونخوا کورمې ولسوالۍ اوسېدونکي دي، چې پېژندګلوي یې د دوی د پاکستاني تابعیتونو او پاسپورتونو له مخې شوې ده.
د پاکستان بهرنیو چارو وزارت د رسمي بیان له مخې، ۳۷ ژوندي پاتې شوې وګړي د پولسو په توقیف کې دي او شاوخوا ۱۰ پاکستانیان لا هم ورک دي.
د بهرنیو چارو وزارت دا هم زیاته کړې، چې په طرابلس کې د پاکستان سفارت په فعاله توګه د پیښې په اړه نور معلومات راټولوي او له ځایي چارواکو سره په اړیکه کې دي.
د پاکستان د بشري حقونو کمیسیون د معلوماتو له مخې، یوازې په ۲۰۲۳ کال کې له ۶۰۰۰ څخه زیاتو پاکستاني وګړو اروپا ته د ناقانونه سفر هڅې کړې دي. خو د ځینو راپورونو د اټکل له مخې هر کال له ۴۰ زرو ډیر پاکستاني وګړي اروپا ته په ناقانونه ډول د سفر هڅه کوي.
د پاکستان لومړي وزیر شهباز شریف د پیښې په اړه ژوره خواشیني څرګنده کړې او اغیزمنو کورنیو سره د مرستې لپاره یې د سملاسي اقدام غوښتنه وکړه.
هغه چارواکو ته هم لارښوونه وکړه چې د دغو جرمونو مسوول انساني قاچاق وړونکو په وړاندې سخت ګاومنه پورته کړي.
د طالبانو د بهرنیو چارو وزارت په ملګرو ملتونو کې د پاکستان د استازي د ادعاو په غبرګون کې ویلي چې له افغانستان څخه سیمې او نړۍ ته د ترهګرۍ ګواښ نشته او کومې امنیتي پېښې چې رامنځته کیږي عاملان یې په پاکستان کې دي.
د دوشنبې په ورځ په ملګرو ملتونو کې د پاکستان استازي منير اکرم وویل چې«افغانستان د داعش خراسان څانګې د ګومارنو اصلي مرکز دی او موږ هغه ادعاوې ردوو، چې ویل کېږي په پاکستان کې دغه ډول استخدام ترسره کېږي.»
اکرم د ملګرو ملتونو د امنیت شورا غونډې ته د وینا پرمهال وویل، چې د داعش په ګډون د افغانستان دننه له شلو ډېرې وسلهوالې ډلې فعالیت لري.
خو د نوموړي ادعاوو ته په غبرګون نن سې شنبه (د سلواغې ۲۳مه) د طالبانو د بهرنیو چارو وزارت ویلي نړۍوالې ټولنې ته ډاډ ورکوي چې د دوی له واک څخه وروسته په افغانستان کې داعش او نورې وسله والې ډلې ځپل شوې دي.
اعلامیه زیاتوي: " پر نړۍوالې ټولنې غږ کوو، چې ځینې هېوادونه د دې پر ځای چې خپلو کورنیو سیاستونو کې د سمونونو له لارې خپل سياسي، امنيتي او اقتصادي ثبات ته كار وكري، هڅه كوي افغانستان د ناسمو تبليغاتو له مخې بې ثباته وښيي."
په اعلامیې کې طالبانو ادعا کړې ده، چې پاکستان د طالبانو او نړۍوالې ټولنې تر منځ بې باوري رامنځته کوي.
په ملګرو ملتونو کې د چین سفیر فو کانګ د دوشنبې په ورځ د امنیت شورا په غونډه کې وویل، چې داعش او څو نورې ترهګرې ډلې په افغانستان کې فعالې دي او له یو بل سره همکاري کوي.
هغه ټینګار وکړ ،چې دغه ډلې د سیمې او نړۍ امنیت ته ګواښ بلل کېدای شي.
د ملګرو ملتونو د امنیت شورا په غونډه کې پاکستان ته ورته ادعا چین هم کړې او د چین استازي په افغانستان کې د داعش، القاعدې او شرقي ترکستان ډلو د وسله والو په موجودیت اندېښنه څرګنده کړه.
هغه د طالبانو له حکومته وغوښتل چې "په افغانستان کې د مېشتو ترهګرو ډلو د له منځه وړلو لپاره کوټلي او مشخص اقدامات وکړي."
فو کانګ دغه راز څرګنده کړه، چین ژمن دی چې په افغانستان کې د ترهګرو ډلو د له منځه وړلو لپاره له طالبانو سره د همکارۍ لپاره د منځنۍ اسیا د هېوادونو او د شانګهای د همکارۍ سازمان له هڅو ملاتړ وکړي.
طالبانو د چین او روسیې د استازو پر څرګندونو خاموشي غوره کړې ده.
پاکستاني رسنۍ ډان د پاکستان پوځ له قوله ویلي، چې تېره شپه د شمالي وزیرستان د میرانشاه او د پښتونخوا په کرک کې د پوځي عملیاتو پر مهال نهه وسله وال وژل شوي، چې درې هغه یې افغانان دي. پوځ ویلي، چې په دغو عملیاتو کې درې وسله وال ټپیان شوي هم دي.
د پاکستان ډان ورځپاڼې د راپور له مخې د دغه هیواد پوځ تیره شپه د شمالي وزیرستان میرانشاه ولسوالۍ په تپې سیمه کې د پاکستان پوځ په عملیاتو کې د ټي ټي پي پنځه وسله وال وژل شوي او درې نور ټپیان دي،
د ډان د سرچینو په خبره، په وژل شویو کې د «ضرار افغان، نقیب الله افغان او سرکش افغان په نومونو درې وسله وال شامل دي.»
د دوشنبې تر ناوخته پورې، د پاکستان پوځ د رسنیو څانګې د یادو عملیاتو په اړه کومه رسمي خبرپاڼه نه وه خپره کړې.
ځایي سرچینو ویلي، چې له برید وروسته د وسله والو پټنځای اور واخیست او ځینې جسدونه دومره سوځوېدلي دي، چې پیژندل یې ناشوني وو، او پوځ له عملیاتو وروسته دغه جسدونه او ټپیان نامعلوم ځای ته لېږدولي دي.
سربېره پردې د پښتونخوا کرک ولسوالۍ د داود شاه بندر په میرکاکم سیمه کې هم د پولیسو او امنیتي ځواکونو په ګډو عملیاتو کې د پاکستاني طالبانو د تحریک، مهم قوماندان کلیم الله د ډلې څلور تنه وژل شوي دي.
چارواکو ویلي چې یادې ډلې تېره اوونۍ د بهادرخیلو په سیمه کې په یوې امنیتي پوستې برید کړی وو چې په پایله کې ۳ پاکستاني پولیس وژل شوي او ۶ نور ټپیان و.
ډان د یو بل خبر له مخې، ویلي، چې د پښتونخوا په تیرا کې د قبایلي سوداګرو د مشر حاجي شیر محمد او د هغه د ملګري له وژل کېدو څخه وروسته ځایي خلک په ویره کې دي.
حاجي شیر محمد د تیرا بازار د سوداګرو د ټولنې مشر و، چې څو ورځې وړاندې د ټي ټي پي په یوه برید کې له خپل یوه بل همکار سره ووژل شو.
یوه ځايي سوداګر، چې نه یې غوښتل نوم یې واخیستل شي، ډان ته ویلي: «ځایي سوداګرو او عادي اوسیدونکو په امنیتي ادارو خپل باور له لاسه ورکړی،اوس دوی د خپل مشر او یوه همکار د وژل کېدو وروسته ځان ترهګرو پیښو له امله ځان ناامني احساسوي.»
