له کابل څخه دوو باوري سرچینو د افغانستان انټرنشنل ته تایید کړه چې د طالبانو د کور او ښارسازۍ وزارت مالي او اداري مرستیال ارسلا خروټی په نني ځانمرګي برید کې ټپي شوی دی. د سرچینو په وینا نوموړی د درملنې لپاره په کابل کې ایمرجنسي روغتون ته انتقال شوی دی.
سرچینو افغانستان انټرنشنل ته ویلي، چې د ښاغلی ارسلا خروټي روغتیايي وضیعت نازک دی.
همدارنګه سرچینو ویلي، چې په دغه ځانمرګي برید کې دوه کسان وژل شوي او درې نور ټپیان شوي دي.
د طالبانو د کورنیو چارو وزارت منلي، چې د ښار او کور جوړونې په وزارت کې ځانمرګی برید شوی، خو تر اوسه یې د ارسلا خروټي د ټپي کېدو په اړه څه نه دي ویلي.
د طالبانو د کور او ښار جوړونې وزارت ویاند محمد کمال افغان رسنیو ته ویلي، چې ځانمرګي بریدګر وزارت ته د داخلیدو پلان درلود، خو امنیتي ځواکونو وزارت ته د داخلیدو پر مهال له منځه یووړ.
افغان ویلي، چې د دغې چاودنې پرمهال یو کس وژل شوی او درې نور ټپیان شوي.
تر اوسه د دغه برید مسولیت هیڅ ډلې پرغاړه نه دی اخیستی، خو دې ته د ورته نورو بریدونو مسولیت داعش ډلي منلی دی.
د لیندۍ میاشتې په ۲۱مه نېټه د طالبانو د کډوالو چارو وزیر خلیل الرحمن حقاني د وزارت دننه د جومات څخه د راوتلو پر مهال ځانمرګی برید پري وشو او نوموړی ووژل شو. پر خلیل الرحمن حقاني د ځانمرګي برید مسولیت داعش خراسان ډلې پر غاړه اخیستی و.
