د برېتانیا د جرمونو ملي ادارې او بلجیم پولیسو له ګډو څېړنو وروسته شپږ افغانان د انساني قاچاق وړونکو په یوه لویه ډله کې د غړیتوب په تور نیول شوي. دغه کسان چې په بلجیم کې تر څار لاندې وو، د چهارشنبې په ورځ د برېتانیا په لیسټر، برمنګهم، کووینټري او ایسکس کې ونیول شول.
د بلجیم څارنوالانو وویل چې دغه کسان د ایران، ترکیې او بالکان له لارې لویدیځې اروپا ته د افغان کډوالو په قاچاق او بیا په کوچنیو کښتیو کې برېتانیا ته په لیږدولو کې ښکیل وو.
د جرمونو ملي ادارې په یوه بیان کې زیاته کړې چې دغه ډله له ۲۰۲۲ کال راهیسې فعاله وه او ظاهرا یې د پناه غوښتونکو او کډوالو سره د اړیکو لپاره له ټولنیزو رسنیو څخه کار اخیست.
دغې ادارې ویلي چې هغه کډوال چې په بلجیم کې یې د پناه غوښتنې غوښتنلیکونه رد شوي وو، د دې ډلې لخوا په کوچنیو کښتیو کې برېتانیا ته لیږدول کېدل.
پر دې ډلې شک دی چې په دې ډول یې «د پام وړ شمیر» پناه غوښتونکي برېتانیا ته لیږدولي دي.
د دې ډلې درې غړي د چهارشنبې په ورځ په لندن کې د ویسټ منسټر محکمې ته حاضر شول، او ټاکل شوې ده چې درې نور کسان د راتلوونکي پنجشنبې په ورځ په ورته محکمه کې حاضر شي.
ټول شپږ کسان د انساني قاچاق او په یوه جرمي سازمان کې د غړیتوب په تور تورن دي.
