اوکراین او روسیه یو بل د سولې په خبرو کې په نه جديتوب تورنوي

د چهارشنبې په ورځ نوي تورونه یوه ورځ وروسته له هغه راپورته شول چې متحده ایالاتو وویل، اوکراین او روسیې په سعودي عربستان کې د جلا - جلا خبرو اترو وروسته په تور سمندرګي کې د بېړیو په وړاندې د پوځي بریدونو د بندولو موافقه کړې ده.
د اوکراین هوایي ځواک ویلي، تېره شپه د روسیې له خوا ۱۱۷ ډرون الوتکې توغول شوې چې لږ تر لږه ۵۶ ډرونونه یې نسکور شوي، ۴۸ یې د برېښنایي جګړې له امله له منځه تللي او کوم زیان نه دی اوښتی.
خو د میکولایو ښاروال وویل چې د ډرونونو له امله برېښنا پرې شوې ده.
د کریوي ریح په ښار کې د روسیې برید ودانیو ته زیان اړولی، خو د مرګ ژوبلې راپور نه دی ورکړل شوی.

د راپورونو له مخې د سومي په سرحدي سیمه کې هم ودانۍ زیانمنې شوې دي، چې په دې وروستیو ورځو کې تر سختو بریدونو لاندې راغلې ده.
د کریوي ریح د پوځي ادارې مشر اولیکساندر ویلکول دغه برید تر ټولو لوی برید وباله او زیاته یې کړه: «ظاهراً دا هغه طریقه ده چې نیواکګر پرې سوله غواړي.»
د اوکراین ولسمشر ولادیمیر زېلېنسکي، د تېرې شپې بریدونه وغندل او ویې ویل چې دا «ټولې نړۍ ته یو روښانه پیغام دی چې مسکو د واقعي سولې لپاره هڅه نه کوي.»
زېلېنسکي پر اېکس لیکلي: «د مارچ له ۱۱مې راهیسې د امریکا له خوا د بشپړ اوربند او د بریدونو د درولو وړاندیز شوی، خو روسیه هره شپه د خپلو بریدونو له لارې زموږ د شریکانو د سولې وړاندیز ته ‘نه’ وايي.»
د روسیې د دفاع وزارت په خپله اعلامیه کې ویلي، اوکراین د کریمیا ټاپووزمې پر ګازو ذخیره کولو تاسیساتو او د بریانسک په سیمه کې د برېښنا په یوه تاسیساتو باندې د ډرون برید کړی، کوم چې د اوکراین او د هغې د سومي سیمې سره پر پوله موقعیت لري.
دې وزارت لیکلي: «د کییف رژیم چې د روسیې د ملکي انرژۍ بنسټونه زیانمنوي، په حقیقت کې هر څه کوي څو د روسیې او امریکا ترمنځ هوکړې ګډې وډې کړي.»
اوکراین دا تورونه رد کړي چې ګواکي دوی د روسیې په یادو دوو سیمو کې د انرژۍ پر بنسټیزو تاسیساتو بریدونه کړي دي.
د الجزیرې د راپور له مخې، نورې خبرې اترې به "سختې" وي ځکه چې دواړه خواوې د تورونو تبادلې ته دوام ورکوي.
راپور زیاتوي: «پرله پسې تورونه ښیې چې په دې شخړه کې د دواړو خواوو ترمنځ وضعیت څومره ستونزمن او نازک دی او د امریکایي چارواکو دنده څومره ستونزمنه ده.»
متحده ایالاتو د سې شنبې په ورځ له اوکراین او روسیې سره موافقه وکړه، چې د تور سمندر په سیمه کې د دواړو هېوادونو بېړۍ کولی شي خوندي تګ راتګ وکړي او دواړه هېوادونو باید د یو بل د انرژۍ پر تاسیساتو بریدونه و نه کړي.
کرملین وویل چې د تور سمندرګي تړون د پلي کېدو دمخه "یو شمېر شرایط" باید پوره شي، په شمول د ځینو روسي بانکونو او نړۍوال مالي سیسټم ترمنځ د اړیکو بیا رغونه.
له دې سره، د اروپایي اتحادیې یوه ویاند د چهارشنبې په ورځ وویل چې د روسیې د بندیزونو د لرې کولو یا تعدیل لپاره یو له اصلي شرایطو څخه به "په اوکراین کې د روسیې د بې دلیله او ناعادلانه یرغل پای ته رسېدل او د ټولو روسي پوځي ځواکونو غیر مشروط وتل" وي.