اکسیوس خبري وېبپاڼې د دوو باخبره سرچینو په حواله راپور ورکړی، چې د امریکا ولسمشر ډونالډ ټرمپ د سپینې ماڼۍ په «وضعیت خونه» کې د بندو دروازو شاته یوه پټه غونډه کړې او د خپل دولت له لوړپوړو چارواکو سره یې د ایران د اټومي تاسیساتو پر سر د مذاکراتو په تړاو خبرې کړې دي.
د نوموړې وېبپاڼې د راپور پر بنسټ، په دې ځانګړې او لوړه کچه غونډه کې د سيایاې ادارې مشر او دفاع وزیر په ګډون د ټرمپ د دولت ټولو لوړپوړو چارواکو ګډون کړی او له ایران سره د راتلونکو مذاکراتو په تړاو یې بحث او خبرېاترې کړې دي.
د ټرمپ مرستیال جي ډي وېنس، د بهرنیو چارو وزیر مارکو روبیو، د دفاع وزیر پېټ هېګسیت، د سپینې ماڼۍ د ملي امنیت سلاکار مایک والټز، د ټرمپ ځانګړی استازی سټېف وېټیکر، د سيایاې مشر جان راټکلیف، او متحدهایالاتو د ولسمشر د کابینې یو شمېر نورو لوړپوړو چارواکو ګډون کړی دی.
ټاکل شوې، چې د عمان پلازمېنه مسقط ښار د راتلونکې شنبې په ورځ (د وري ۳۰مه) د ایران او متحدهایالاتو ترمنځ د اټومي تاسیساتو پر سر د دویم پړاو مذاکراتو کوربهتوب وکړي.
د یادونې ده، چې د امریکا ولسمشر ډونالډ ټرمپ د دغو مذاکراتو له پیلېدو مخکې خبرداری ورکړی، چې که امریکا اړ شي څو اټومي وسلو ته د ایران د لاسرسي مخنیوی وکړي، پر اټومي تاسیساتو د برید په ګډون به د دغه هېواد په تړاو «یوه ډېره سخته پرېکړه» وکړي.
ټرمپ په سپینه ماڼۍ کې خبریالانو ته څرګنده کړې: «ایران باید د اټومي وسلو له خوبونو لاس واخلي. هغوی حق نهلري چې اټومي وسله ولري.»
بلخوا د اسراییل لومړي وزیر بنیامین نتنیاهو د غزې شمالي سیمې ته د سفر پرمهال وايي، چې ایران له امریکا سره داسې مهال مذاکرات کوي چې خامنهيي لا هم د اسراییل پر وړاندې د جګړې خبرې کوي.
