د داعش وسله والې ډلې ( پاکستان څانګې) د پاکستان د بلوچستان په مستونګ سیمه کې د سې شنبې په ورځ د پولیسو پر موټر د خونړي برید مسوولیت پر غاړه اخیستی. په دې پېښه کې لږ تر لږه درې امنیتي سرتېري وژل شوي او ۱۶ نور ټپیان دي.
د اسلامي دولت ډلې یا داعش اړوند خبري اژانس اعماق د برید مسوولیت منلی او ادعا یې کړې چې برید د دوی جنګیالیو کړی دی.
د چارواکو په وینا، دا برید د شمس اباد په سیمه کې د امنیتي ځواکونو پر هغه موټر شوی، چې د کلات له سیمهییز روزنیز مرکزڅخه پر لاره و. د برید لپاره د سړک غاړې چاودېدونکی بم کارول شوی.
د بلوچستان حکومت ویاند شاهد رند وویل، چې دوه تنه سخت ژوبل دي او کوټې ښار ته لېږدول شوي دي.
د بلوچستان اعلی وزیر سرفراز بګټي د روغتیا وزیر ته سپارښتنه کړې چې د ټپیانو د درملنې چارې له نږدې وڅاري.
د پاکستان لومړي وزیر شهباز شریف برید غندلی او له قربانیانو سره یې خواخوږي څرګنده کړې ده. هغه وویل، حکومت به د ترهګرۍ پر ضد جګړه تر هغه وخته جاري ساتي، چې دا ناورین له هېواده بشپړ ورک شي.
دا برید داسې مهال شوی، چې په وروستیو میاشتو کې بلوچستان او خیبر پښتونخوا د ګڼو امنیتي پېښو شاهد دي.
د پاکستان د څېړنې او امنیتي مطالعاتو مرکز د نویو شمېرو له مخې، یوازې د ۲۰۲۵ کال په لومړۍ رُبع کې ۸۹۷ کسان د تاوتریخوالي له امله وژل شوي او ۵۴۲ نور ټپیان شوي دي. د دې پیښو مجموعي شمېر ۳۵۴ ته رسېږي.
بلوچستان په دې موده کې د ټولو تلفاتو ۳۵ سلنه جوړوي، چې د تېرو دریو میاشتو په پرتله پکې ۱۵ سلنه زیاتوالی راغلی دی.
د دغه سازمان لهخوا په خپاره شوي راپور کې د سلما په نوم د یوې افغان کډوالې کیسه هم راغلې.
سلما د ننګرهار ولایت ده؛ خو له ۱۵ کلونو راهیسې یې له خپلې کورنۍ سره په پاکستان کې ژوند کاوه.
هغه د هغو کسانو په ډله کې وه، چې د پاکستان لهخوا د افغانانو د جبري بېرته ستنولو پرمهال افغانستان ته ستنه کړل شوه.
د سلما لپاره له پاکستان نه د اېستلو مسله د حیرانتیا خبره وه او هغې دا تمه نه لرله، چې هغه به افغانستان ته د بېرته ستنېدو سره سم یو نوی ژوند وزېږوي.
سلما د ۳۸ اونیو مېندواره وه، کله چې هغې له پاکستان څخه د افغانستان خواته روان شول.
سلما وایي: «دا زما لپاره یو ستونزمن سفر و؛ ځکه چې زه د ۳۸ اونیو مېندواره وم.»
هغې وویل: «ما وېره لرله او نه پوهېدم، چې څه وکړم؛ خو له نېکه مرغه روغتیایي کارکوونکي د طبي مرستو چمتو کولو لپاره راغلل. دوی زه د تورخم صفري نقطې کې د ملګرو ملتونو لهخوا ملاتړ شوي روغتیایي مرکز ته یوړم.»
په دغه روغتیایي مرکز کې روغتیاپاله صدیقه وایي، که څه هم د سلما خپل وضعیت ښه نه و؛ خو هغه مهال نوموړې تر ځان ډېره د خپلې کورنۍ د هغو غړو په اړه اندېښمنه وه، چې په پاکستان کې پاتې دي.
د ملګرو ملتونو د وګړو صندوق وایي، چې د خپلو شریکانو سره او د انګلستان د حکومت په ملاتړ چمتو دي، چې په سرحدونو کې د مور او نوي زېږېدلو ماشومانو د پاملرنې او رواني ټولنیز ملاتړ خدمتونه چمتو کړي؛ ترڅو د زیان منونکو خلکو او په ځانګړې توګه د مېرمنو، نجونو او ځوانانو ملاتړ وکړي.
خو سلما اوس په افغانستان کې د سرپناه د نشتوالي له امله اندېښمنه ده.
سلما وایي: «موږ لا تر اوسه د ژوند کولو لپاره سرپناه نلرو او زه اندېښمنه یمه، چې موږ به اخر چېرې ځو. د دغه بد وضعیت سره، سره زه د خپل نوي زېږېدلې ماشومې راتلونکې لپاره فکر کوم او په خپل هېواد کې د خپلې کورنۍ لپاره د ښه ژوند دعا کوم.»
د کډوالۍ نړۍوال سازمان د راپور له مخې، د روان کال (د مارچ له ۲۳مې) څخه (د اپرېل تر ۵ مې) پورې له پاکستان او ایران څخه له ۱۳۰ زرو ډېر کسان افغانستان ته تللي دي. له دغې شمېرې څخه له ۶۴زرو ډېر کسان یې له پاکستانه تللي دي، چې د ستنېدو پرمهال ځینې مېرمنې مېندواره وې.