افغان-امریکایي ډېپلومات او د افغانستان د سولې په چارو کې د واشنګټن ځانګړي پخواني استازي زلمي خلیلزاد د کشمیر په پهلګام سیمه کې د وروستي برید په تړاو خبرداری ورکړی او وايي چې د هند لهخوا د پوځي غبرګون احتمال ډېر لوړ دی.
نوموړي د جمعې په ورځ (اپرېل ۲۵مه) د اېکسپاڼې له لارې په یوه بیان کې د هند او پاکستان په تړاو د خپلو څرګندونو په دوام زیاته کړې، که چېرې پاکستان په دغه برید کې ښکېل وي، دا «غېرانساني او بېپروا» اقدام دی.
خلیلزاد د پاکستان پر وړاندې د هند قوي غبرګون احتمال ته په اشارې لیکلي: «په هند کې اوسنۍ سیاسي او ټولنیزې فضا ته په پام، د پاکستان پر وړاندې د پوځي اقدام امکان خورا لوړ دی.»
نوموړي د خپلو څرګندونو په دوام ټینګار کړی: «که چیرې دا څرګنده شي چې پاکستان په رېښتیا هم په دغه برید کې ښکېل دی، نو دا به یو غېرانساني او بې پروا اقدام وي چې د سیمې ثبات لپاره به جدي پایلې ولري.»
د افغانستان په چارو کې د امریکا متحدهایالاتو پخواني ځانګړي استازي زلمي خلیلزاد له دې مخکې د طالبانو لهخوا د هندي کشمیر په پهلګام کې پر سیلانونو د برید غندل یو هڅوونکی پرمختګ بللی دی.
هغه د جمعې په ورځ پر خپله اېکسپاڼه لیکلي:« په یوه هڅوونکي پرمختګ کې طالبانو په کشمیر کې له سیلانیانو سره د ملاتړ څرګندونه او د دغه ترهګریز برید غندنه کړې ده.»
خلیلزاد دا څرګندونې داسې مهال کوي چې د پاکستان او هند ترمنځ اړیکې وروسته تر هغې کړکېچن وضعیت ته ورسېدې، چې دوه ورځې مخکې د وسلهوالو یوې ډلې په هندي کشمیر کې ۲۵ هنديان او یو نیپالی وګړي وژلي او ۲۰ نور یې ټپیان کړي دي.
همداراز، یو شمېر هندي رسنیو راپور ورکړی چې د هند او پاکستاني ځواکونو د کشمیر په کنټرول کرښه کې پر یو بل ډزې کړي دي.په دواړو هېوادونو کې ځواکونه د تیارسۍ په حالت کې دي او وېره شته چې ګوندې هند یو ځل بیا د پاکستان ځینې ښارونه په نښه کړي.
