د برېتانیا پولیسو د «ترهګرۍ ضد عملیاتو» پر مهال ۷ تنه ایراني وګړي نیولي دي
د برېتانیا پولیسو د «ترهګرۍ ضد په دوو جلا عملیاتو» کې اته کسان نیولي، چې له ډلې یې لږ تر لږه ۷ تنه ایراني وګړي دي.
د اسوشیټډ پرېس د راپور له مخې؛ د دغو کسانو له ډلې پنځه تنه چې څلور یې ایراني وګړي دي، د هغه طرحې په تړاو نیولي، چې د برېتانیا په بېلابېلو سیمو کې یې د برید لپاره ځایونه په نښه کړي وو؛ خو د پنځم کس د هویت په تړاو څه نه دي ویل شوي.
دغه نیونې د سوېنډن، لوېدیځ لندن، سټاکپورټ، راچډېل، او مانچسټر ښارونو کې شوي دي.
راپور زیاتوي، چې درې تنه نور ایراني وګړي هم د لندن په ښار کې په یوې جلا قضیه کې نیول شوي دي.