د راولپنډۍ پر لوبغالي برید؛ د «پيسياېل» پاتې لوبې اماراتو ته ولېږدول شوې
د نوي ډیلي او اسلاماباد ترمنځ د تاوتریخوالي د ډېرېدو پر دوام، د پاکستان کرېکټ سوپر لیګ یا «پيسياېل» ټولې پاتې لوبې متحده عربي اماراتو ته ولېږدول شوې.
د نوي ډیلي او اسلاماباد ترمنځ د تاوتریخوالي د ډېرېدو پر دوام، د پاکستان کرېکټ سوپر لیګ یا «پيسياېل» ټولې پاتې لوبې متحده عربي اماراتو ته ولېږدول شوې.
د پاکستان کرېکټ بورډ د پنجشنبې شپې ناوخته دا پرېکره د دغه هېواد په راولپېنډۍ ښار کې د کرېکټ پر لوبغالي د یوې بېپیلوټه الوتکې تر برید وروسته وکړه.
د پاکستان کرکټ بورډ د لاهور ښار په قذافي لوبغالي کې د یوې بېړنۍ غونډې په ترڅ کې د پيسېاېل لوبډلو له مالکانو سره دې هوکړې ته ورسېد چې د دغه لیګ پاتې لوبې په متحده عربي اماراتو کې وکړي.
ورته مهال، د پاکستان امنیتي چارواکي وايي چې د راولپېنډۍ پر نړۍوال لوبغالي د بېپیلوټه الوتکې د برید سرچینې او موخې په تړاو څېړنې روانې دي.
همداراز، رویټرز خبري اژانس د برېټانیوي رسنیو په حواله راپور ورکړی چې ۷ برېټانوي لوبغاړي چې دا مهال د پاکستان په سوپر لیګ کې لوبېږي، پر دې غور کوي چې ایا بېرته خپل هېواد ته ستانه شي او که نه!
هغه لوبه چې ټاکل شوې وه تېره شپه د کراچۍ کېنګز او پېښور زلمي لوبډلو ترمنځ ترسره شي، لغوه او بل وخت ته وځنډول شوه.
متحده عربي اماراتو ته د پاکستان کرېکټ لیګ یا پيسياېل پاتې سیالیو د لېږدولو پرېکړه، داسې مهال کېږي چې ټاکل شوې پاکستانۍ کرېکټ ملي لوبډله په نږدې راتلونکي کې د بنګلهدېش پر وړاندې د ۲۰ اوره سیالیو یوه لوبلړۍ ترسره کړي.
