سرچینې: طالبانو د خوست شېخ زاید پوهنتون ۱۲۰ استادان او اداري کارکوونکي له دندو وشړل

له خوست نه لږترلږه درېیو باوري سرچینو افغانستان انټرنشنل-پښتو ته وویل چې طالبانو د دغه ولایت له دولتي شېخ زاید پوهنتون نه د «تنقیص» په نوم د استادانو او کارکوونکو د ګوښه‌کېدو لړۍ پیل کړې ده.

سرچینو د دوشنبې په ورځ (د غويي ۲۲مه) زیاته کړه، چې طالبانو د یاد پوهنتون د یو شمېر استادانو او کارکوونکو د ګوښه‌کېدو لېستونه چمتو او همدا نن دغې ډلې یو شمېر استادان او اداري کارکوونکي خپلو کورونو ته رخصت کړي دي.
د افغانستان انټرنشنل-پښتو د سرچینو د معلوماتو پر بنسټ، طالبانو شاوخوا ۱۲۰ استادانو او اداري کارکوونکو ته سپارښتنه کړې، چې نور شېخ زاید پوهنتون ته له ورتګ نه ډډه وکړي.
د سرچینو په وینا، په دې لېستونو کې ټول د جمهوري نظام د ماسټرۍ، پوهاندۍ او دوکتورا درجې درلودونکي استادان په نښه شوي او په وینا یې، دا لړۍ به دوام ولري.
سربېره پر دې، له دغه تنقیص نه د یاد پوهنتون یو شمېر نور پخلي‌کوونکي، صفاکاران او نور اداري کارکوونکي هم په امن نه دي او ښايي په نېږدې راتلونکي کې له خپلو دندو ګوشه شي.
سرچینو د شېخ زاید پوهنتون د یوه استاد په حواله ویلي، چې طالبان غواړي د تنقیص په نوم هغه استادان چې د دغې ډلې نه‌خوښېږي، له شېخ زاید پوهنتون نه ګوښه کړي او پر ځای یې د دغې ډلې له مدرسو فارغ ملایان وګوماري.
یوه استاد د نوم نه ښودلو په شرط د افغانستان-پښتو سرچینې ته وویل:« طالبان به له دې وروسته په پوهنتونونو او نورو ادارو کې د تنقیص په نوم هغه کسان هدف وګرځوي، چې د دوی نه خوښېږي او یا له جمهوري نظام ورپاتې دي، نو دا د طالبانو لپاره ښه پلمه ده چې زرګونه ماسټر او دوکتورا لرونکي کسان رخصت او پر ځای یې پوهنتون ته خپل ملایان دننه کړي.»
د یادونې ده، چې طالبانو تر دې وړاندې د ننګرهار، کونړ، پروان، لغمان، بدخشان او یو شمېر نورو دولتي پوهنتونونو نه د جمهوري نظام یو شمېر مسلکي استادان د بېلابېلو پلمو له‌مخې ګوښه کړل.
پر افغانستان د طالبانو له واکمنېدو وروسته په علمي او تخصصي مرکزونو کې د اکاډمیکو کسانو ګوښه‌کېدل په سېستماتیک شکل روان دی او یاده ډله هڅه کوي، چې په دې ځایونو کې له خپلې ایډيالوژۍ سره جوړ او د مدرسو ملایان وګوماري.
د طالبانو له‌خوا پر مدرسې د پوهنتون د بدلېدو روان بهیر د افغان اکاډمیکو شخصیتونو، محصلانو او استادانو ترمنځ پراخې اندېښنې راپاورلي دي.
څه موده مخکې د طالبانو د لوړو زده‌کړو وزارت د انسجام کمېټې یوې سرچینې افغانستان انټرنشنل-پښتو ته ويلي و، چې دغه وزارت د البيروني او پروان پوهنتونونو ۱۴ استادان د استادۍ له دندو ګوښه او اداري بستونو ته یې تبديل کړي دي. ورپسې دغې ډلې د بدخشان پوهنتون شپږ استادان هم له دندو ګوښه کړل.
په افغانستان کې د پوهنتونونو د متخصصو او تجربه‌لرونکو استادانو د ګوښه‌کېدو بهیر داسې مهال روان دی، چې هېواد تر بل هر وخت ډېر علمي او مسلکي پرمختګ ته اړتیا لري.
دا په داسې حال کې ده، چې طالب چارواکو په ځلونو د پوهنتون له هغو استادانو چې له افغانستانه وتلي غوښتي څو بېرته هېواد ته ستانه شي.