د مخکني جمهوري نظام د چارو ادارې پخواني رییس فضل محمود فضلي ویلي، پاکستان د افغانستان د مهارولو لپاره د انګریزانو د تګلارې له مخې د حزب اسلام مشر ګلبدین حکمتیار څخه د «سټراټېژیک بم» په توګه کار اخیستلی دی.
هغه د (غوايي ۲۶مه) پر اېکس پاڼه لیکلي، چې یاده اصطلاح «مذهبي افراطیانو» ته کارول کیده او حکمتیار یې یوه بېلګه ده.
نوموړي دغه څرګندونې د حزب اسلامي د مشر د هغو څرګندونو په غبرګون کې کړي، چې ویلي و، پاکستان د تجزیې له ګواښ سره مخ دی او افغانستان به ترې هم اغېزمن شي.
د فضلي په خبره، د پاکستان د پخواني مشر اسد دراني له لوري په «۱۹۸۹لمریز» کال کې داسې طرحه جوړه شوې وه، چې ګوندې د ډاکټر نجیب الله تر پرځېدو وروسته به له افغانستان سره «کنفډراسیون» جوړ کړي او حکمتیار هم د دغې طرحې اصلي طراح ځان باله.
د چارو ادارې د پخواني مشر په وینا: «نن د حکمتیار د دې خبر څخه ۳۵کاله تېر شوي، خو نه حکمتیار او نه هم دراني وکولای شول دا خیال عملي کړي.»
د نوموړي په وینا، حکمتیار او پاکستان اوس هم هر کال دغه ناکام پلان په بېلابېلو الفاظو کې تکراروي.
فضلي ټینګار کړی چې د پاکستان د تجزیې په تړاو د حزب اسلامي د مشر څرګندونې رښتیا دي، ځکه هغه یو ملت نه دی او د افغانستان په اړه یې بیا څرګندونې یوازې په خیالاتو ولاړې دي.
تر دې مخکې هم د ګلبدین حکمتیار د څرګندونو په تړاو بېلابېل غبرګونونه راغلي دي.
بېلابېلو سیاستوالو دغو څرګندونو ته په غبرګون کې ګلبدین حکمتیار د پاکستان لاسپوڅی بللی او له هغه یې غوښتي چې په راتلونکي کې له دغه ډول څرګندونو ډډه وکړي.
