د افغان ښځو نجونو او بشري حقونو لپاره د امریکا د بهرنیو چارو وزارت پخوانۍ ځانګړې استازې رینا امیري وایي، چې ټول باید د افغان مېرمنو ترڅنګ ودرېږي؛ ځکه چې په خبره یې افغانستان کې روان وضعیت نه یوازې یوه تراژیدي، بلکې د بشریت پر وړاندې جرم دی.
نوموړې دغه څرګندونې د کلیفورنیا ایالت په سکرمېنټو ښار کې د «جنسیتي توپیر پای ته ورسوئ» تر عنوان لاندې یوې ناستې ته کړې دي.
هغې ویلي، جلاوطنه افغانان د افغان ټولنې هغه پیاوړي استازي دي، چې هیڅکله د بشري حقونو د ټینګښت لپاره په خپله مبارزه کې نهیلي شوي نه دي.
هغې د هغو مېرمنو د ملاتړ غوښتنه وکړه، چې په دغه ډول سختو شرایطو کې د طالبانو تر واک لاندې جنسیتي توپیر سره په افغانستان کې ژوند کوي.
اغلې امیري زیاته کړه، چې نړۍواله ټولنه باید طالبان د افغانستان دننه د هر ډول جرم په تړاو مجرم وګڼي او هغوی ځواب ورکونې ته راوکاږي.
د اغلې امیري ترڅنګ په دغې ناسته کې جلاوطنه افغان ښځینه فعالانو او د ځینو نورو هېوادونو ښځینه فعالانو هم ګډون کړی و.
د دغې ناسته په خبرپاڼه کې ښځینهو ګډونوالو له حوالې راغلي، چې افغانان باید د ښځو د وضعیت د ښهوالي او د طالبانو د جنسیتي توپیر د پای ته رسولو لپاره په ګډه سره کار وکړي.
د دغه ناستې ویناوالو په افغانستان کې د ښځو وضعیت د اندېښنې وړ وباله او ویې ویل، چې د ښځو د طبیعي حقونو محدودول باید د ټولو نړۍوالو معیارونو سره سم د «جنسیتي توپیر» په توګه په رسمیت وپېژندل شي.
ملک ستیز چې د نړۍوالو اړیکو او بشري حقونو کارپوه دی په ناسته کې یې د خپلې وینا پرمهال وویل، اوسمهال د طالبانو نظام، د دغې ډلې د مشرتابه فتواګانې او د دوی ستره محکمه په افغانستان کې د ښځو پر وړاندې عمل کوي.
هغه زیاته کړه، چې اوسني شرایط یوازې د ښځو محدودول نه دي؛ بلکې د طالبانو لهخوا «جنسیتي توپیر» دی.
د افغان-امریکن بنسټ مشر استیو فاریابي په امریکا کې له بېلابېلو سازمانونو او له سنا جرګې غوښتي، چې طالبانو تر واک لاندې له دغه وضعیته د افغان مېرمنو د وتلو لپاره دې هڅه وکړه.
هغه له نړۍوالې ټولنې او په ځانګړې توګه له ملګرو ملتونو او امنیت شورا وغوښتل، چې د افغان ښځو ملاتړ وکړي او ټینګار یې وکړ، چې طالبان باید په هیڅ حالت کې په رسمیت ونه پېژندل شي.
د ښاغلي فاریابي په وینا، د امریکا کانګرس باید طالبانو ته هر ډول مرستې ودروي او له دغې ډلې سره دې له هر ډول تعامل څخه ډډه وکړي.
په دغې ناسته کې د ګلشن یوسفزۍ، حسینا جلال، میترا مهران، سپوږمۍ ناصري او بلقیس احمدي په څېر ګڼو د بشري حقونو او د ښځو د حقونو فعالانو خبرې کړې دي.
په راپور کې راغلي، چې د دغې ناستې اصلي موخه له هېواده بهر د بېلابېلو سازمانونو ترمنځ د طالبانو لهخوا د «جنسیتي ټوپیر» پر وړاندې د مبارزې په برخه کې همغږي ښودل شوې ده.
