د ترکیې دولت اړوند اناډولو خبري اژانس د فلسطین د روغتیا وزارت په حواله راپور ورکړی، چې په تېرو ۲۴ ساعتونو کې پر غزې د اسراییل د بریدونو په ترڅ کې ۴۷ کسان وژل شوي دي.
یاد اژانس د دوشنبې په ورځ (د جون ۹مه) په خپل راپور کې زیاته کړې، چې په دې بریدونو کې ۳۸۸ نور کسان ټپیان او روغتون ته لېږدول شوي دي.
د یادونې ده، چې د غزې جګړه ځپلو خلکو د دویم کال لپاره اختر د جګړې تر سیوري لاندې ولمانځله.
پر غزې د اسراییل د بریدونو د دوام له امله د وژلشویو کسانو شمېر ۵۴ زره او ۹۲۷ تنه او د ټپیانو بیا ۱۲۶ زره او ۶۱۵ ته لوړ شوی دی.
تېره ورځ د ترکیې انادولو اژانس د فلسطین حکومت د رسنیو د دفتر له قوله راپور ورکړی، چې په غزه کې له نږدې دوو کلونو راهیسې په روانه جګړه کې ۲۲۶خبریالان وژل شوي دي.
دا په داسې حال کې ده، چې وړمه ورځ د سعودي عربستان وليعهد محمد بن سلمان د فلسطین پر وړاندې د اسراییلي یرغل د «ناوړه پایلو» د پای ته رسېدو لپاره د نړۍوالې ټولنې پر مهم رول ټینګار وکړ.
