د طالبانو لهخوا په چین کې ټاکل شوی سفیر بلال کریمي د «ټرانس همالیا فورم» په پنځمه غونډه کې ګډون کړی او په خپله وینا کې یې له نړیوالو، په ځانګړي ډول له بهرنیو پانګوالو، غوښتنه کړې چې افغانستان کې له سوداګریزې پانګونې او فرصتونو ګټه واخلي.
بلال کریمي دغه غونډه چې د سیمې د اقتصادي، اقلیمي، انرژۍ او پانګونې پر موضوعاتو متمرکزه وه، یوه ارزښتمنه سیمهییزه غونډه وبلله او هیله یې وښوده چې دا ډول ناستې باید یوازې تشې غونډې نه وي، بلکې عملي پایلې هم ولري.
نوموړي زیاته کړه: « افغانستان اوس د پراخو پانګونو لپاره پرانیستی هېواد دی، موږ بهرني پانګوال هڅوو چې دلته راشي، وضعیت له نږدې وڅېړي او له شته فرصتونو ګټه واخلي.»
طالب سفیر په خپله وینا کې ډاډ ورکړ چې د طالبان د بهرنیو پانګوالو د امنیت خوندیتوب ته ژمن دی.
هغه وویل: «موږ هڅه کوو چې یوه باوري فضا رامنځته کړو تر څو نړیوال پانګوال دلته په ارامه پانګونه وکړي.»
په افغانستان کې د طالبانو واک ته رسېدو وروسته، چین د هغو څو هېوادونو له ډلې دی چې له افغانستان سرهیې خپل تماسونه جاري ساتلي دي. چین د افغانستان جیوپولیټیک موقعیت، معدني سرچینو او د سیمې اتصال ته ځانګړې پاملرنه لري.
بیجینګ له طالبانو سره اقتصادي اړیکو ته لېوالتیا ښودلې او تر دې دمه یې له یو شمېر طالب چارواکو سره د پانګونې، انرژۍ، ترانسپورټ او کانونو په برخه کې خبرې کړې دي. چین همداراز هڅه کوي چې افغانستان د «یو کمربند یوه لار» پروژې سره ونښلوي.
د یادولو وړ ده، که څه هم چین لا تر اوسه د طالبانو حکومت په رسمیت ندی پېژندلی، خو د دواړو خواوو ترمنځ سیاسي، اقتصادي او امنیتي تماسونه دوام لري. دا اړیکې د چین لپاره یوه مهمه سیمهییزه محاسبه ده، څو خپل اقتصادي، سیاسي او امنیتي ګټو ته وده ورکړي.
