د ایران د بهرنیو چارو وزیر عباس عراقچي د امریکا ولسمشر ډونالډ ټرمپ څرګندونو ته په غبرګون کې وايي چې که ټرمپ رېښتینې هوکړه غواړي، نو باید د ایران د لوی مشر ایتالله علي خامنهيي پر وړاندې «د سپکاوي ډکې ژبې او د خپلو مېلیونونو ملاتړکوونکو له ځورونې نه لاس واخلي.»
عراقچي تېره شپه ناوخته په خپله اېکسپاڼه کې لیکلي چې ایرانیان سخت او قوي خلک دي او هغوی د لاس جوړې غالۍ غوندې، په صبر او هڅو جوړ شوي دي. نوموړي لیکلي: «موږ خپل ارزښت پېژنو، موږ خپله خپلواکي ساتو او موږ هیچا ته اجازه نه ورکوو چې زموږ برخلیک وټاکي.»
عراقچي زیاته کړې چې ایرانیان د ګواښونو او سپکاویو پر وړاندې نرم او مهربانه چلند نه کوي. هغه وايي، ایران وښوده چې د اسراییل رژیم د ایراني توغندیو نه د ځان ساتنې لپاره له متحدهایالتونو د مرستې غوښتنه وکړه.
د هغه په وینا، که چیرې ګومانونه د ناسمو پرېکړو لامل شي، ایران چمتو دی چې خپلې رېښتیني وړتیاوې وښيي؛ هغه وړتیاوې چې د ایران د ځواک په اړه هر ډول ناسم ګومان پای ته رسوي. هغه لیکلي: «نیکي، نیکي او درناوی، درناوی رامنځته کوي.»
عراقچي دا څرګندونې وروسته تر هغې کوي چې پرون د امريکا ولسمشر، ډونالډ ټرمپ، په يوې خبري ناسته کې د ايران د دولت پر مشرعلي خامنهیي ملنډې ووهلې او ویې ویل « هغه باید رېښتیا ووایي او ماتې ومني».
