هندي چارواکو د یکشنبې په ورځ له پاکستان سره د احتمالي سرحدي سېلابونو په اړه معلومات شریک کړي دي. دا خبرداری په جمو او کشمیر سیمه کې د سختو بارانونو له امله ورکړل شوی. هند دا معلومات د ایندوس تړون پرځای له ډیپلوماتیکو لارو ور رسولي.
پاکستان وویل چې هند دغه معلومات له دیپلوماتیکو لارو ور رسولي، نه د ۱۹۶۰ کال د «اېندوس اوبو تړون» له مخې.
د هند یوې سرچینې رویټرز ته ویلي، چې خبرداری یوازې د «بشري خواخوږۍ» له مخې ورکړل شوی.
د روانو بارانونو او سېلابونو له امله تر اوسه په پاکستان کې ۷۹۹ او په هند کې لږ تر لږه ۶۰ تنه مړه شوي دي. چارواکي وايي د سپټمبر تر لسمې به د نورو سختو بارانونو احتمال هم وي.
د پاکستان د پېښو مدیریت ادارې ویلي، د هند له لوري شریک شوي اطلاعات د تاوي سیند د اوبو د ډېرېدو په اړه وو، چې له سرحده تر تېرېدو وروسته د ستلج سیند بڼه خپلوي.
پاکستان بیا هم له هند څخه غوښتي چې د «اېندوس د اوبو تړون» ټول شرایط عملي کړي او خبرداری یې ورکړی چې د تړون ځنډول د نړیوال قانون جدي سرغړونه ده چې د سیمې پر سولې او ثبات منفي اغیزې لرلی شي.
خو بنګلهدېشي چارواکي بیا وايي، چې د پاکستان او بنګلهدېش د وېش پر مهال اسلاماباد پر بنګلهدېش ډېر ظلمونه کړي او لا هم اسلاماباد د «بښنې غوښتنې» پوروړی دی.
د پاکستان پوځ د دواړو هېوادونو د وېش پر مهال په ۱۹۷۱ کال کې پر بنګلهدېشيانو د ګڼو ظلمونو پر کولو تورن دی او د بنګلهدېش په وینا، پاکستاني پوځیانو په بنګلهدېش کې سلګونه زره کسان وژلي او لا هم بنګلهدېشيان له اسلاماباده غواړي، چې له دوی څخه بښنه وغواړي.
د پاکستان د بهرنیو چارو وزیر اسحاق ډار له شاخوا ۱۳ کلونو وروسته لومړنی لوړپوړی پاکستانی چارواکی دی چې بنګلهدېش ته یې سفر کړی، وايي: «د دې امکان او ظرفیت ډېر دی چې د دواړو هېوادونو د خلکو لپاره ښه کارونه وشي.»
د بنګلهدېش د بهرنیو چارو سلاکار محمد توحید حسین بیا ویلي، د بښنې موضوع لا حل شوې نه ده، خو له پاکستاني لوري سره په کتنو کې په دې هوکړه وشوه، چې د دواړو هېوادونو اړیکې باید پیاوړې شي.
د پاکستان بهرنیو چارو وزارت بیا د یوې خبرپاڼې په خپرولو سره ویلي، محمد اسحاق ډار د بنګلهدېش له لوري په رسمي بلنه دغه هېواد ته تللی وو.
د خبرپاڼې له مخې، په دغه سفر کې د دواړو هېوادونو تر منځ د سوداګرۍ او اقتصادي اړیکو د پراخولو او همداراز د کلتوري تبادلو په برخو کې ۶ هوکړې او پروګرامونه هم لاسلیک شوي دي.
شنونکي وايي، د دواړو هېوادونو ګاونډی هېواد هند د پاکستان او بنګلهدېش اړیکې له نږدې څاري او په وینا یې له ډاکا سره د نوي ډیلي اړیکې د ۲۰۲۴ کال په اګست کې وروسته له هغې سړې شوې، چې په بنګلهدېش کې د ولسي پاڅون له امله د دغه هېواد لومړۍ وزیرې شېخ حسینه حکومت رانسکور او په خپله یې هند ته پناه یوړه.