د طالبانو ټولګټو چارو وزارت وايي، په تېره اونۍ کې د هېواد د رېلپټلۍ له لارې له ۸۰ زره ټنو زیات توکي انتقال شوي، چې د نفتي، غیر نفتي او سوداګریزو مالونو ترڅنګ پکې د کاني ډبرو صادرات هم شامل دي.
دغه وزارت د دوشنبې په ورځ په ایکسخپره کړې خبرپاڼه کې لیکلي، چې د زمري له ۲۴مې تر ۳۰مې نېټې پورې د حیرتان له لارې ۴۵زره او ۵۲۳ ټنه، د اقینې له لارې ۱۱زره او ۸۷۱ ټنه، د تورغونډۍ له لارې ۹زره او ۳۴۷ ټنه او د خواف- هرات له لارې ۱۳زره او ۵۱۱ ټنه توکي انتقال شوي دي.
په خبرپاڼه کې ویل شوي چې په همدې موده کې شاوخوا ۱۲۹ ټنه معدني ډبرې هم له هېواده صادرې شوې دي.
د طالبانو ټولګټو چارو وزارت ټینګار کړی چې هڅه کوي د سوداګرو لپاره د انتقالاتو ښه شرایط او اسانتیاوې برابرې کړي.
