د طالبانو د کانونو او پټرولیم وزیر «هدایت الله بدري» د تاتارستان په کازان کې د ۵شنبې په ورځ د کازان انرژۍ له پوهنتون څخه د لیدنې پر مهال د یاد پوهنتون له مسوولینو د افغان انجینرانو د روزنې په برخه کې د همکارۍ غوښتنه وکړه.
د دغه وزارت د خبرپاڼې له مخې، طالب وزیر هدایت الله بدري د کازان پوهنتون له مسوولینو غوښتي، چې د برېښنا او نفتو په برخو کې د افغان انجینرانو د مسلکي وړتیاوو د لوړولو په برخه کې همکاري وکړي.
د خبرپاڼې له مخې، د یاد پوهنتون مسوولینو هم « په شفاهي توګه» په انلاین او حضوري بڼه د زده کړو په برخو کې د همکاریو ډاډ ورکړی دی.
ویل کېږي په یاد پوهنتون کې یو شمېر افغان زده کړیالان هم پر زده کړو بوخت دي او په پوهنتون کې یې شته ستونزې له هدایت الله بدري سره شریکې کړي او د خبرپاڼې له مخې، بدري هم د حل ډاډ ورکړی دی.
د جرمني بهرنیو چارو وزارت د افغان پناه غوښتونکو د منلو او لېږد پروګرام چې څه موده وړاندې درېدلی و، بېرته پیل کړی دی. د راپورونو له مخې، لومړنی پرواز چې ۵۰افغان پناه غوښتونکي به لېږدوي، د دوشنبې په ورځ به د جرمني هانوفر ښار ته ورسېږي.
یوې جرمنۍ ورځپاڼې «بیلډ» د پنجشنبې په ورځ د یاد وزارت د سرچینو له قوله لیکلي، چې دغه پناه غوښتونکي به نن له اسلاماباد څخه د ترکيې (استانبول) ښار او له هغه ځایه جرمني ته ولېږدول شي.
په دې الوتنه کې ۱۲کسان اصلي غوښتونکي او ۳۸نور د هغوی د کورنۍ غړي دي. د پناه اصلي غوښتونکي هغه کسان دي چې په افغانستان کې یې د جرمني لپاره کار کړی، لکه ځایي کارکوونکي، ژباړونکي، چلوونکي، ساتونکي او نور کارکوونکي په بېلابېلو برخو کې. په دغه ډله کې یو شمېر خبریالان او مدني فعالان هم شامل دي.
د راپورونو له مخې، له ۲زرو زیات افغان پناه غوښتونکيلا هم په پاکستان کې د جرمنيد لېږدد پروسې په تمه دي.
دغه کسان د جرمني د حکومت تر مالي او حقوقي ملاتړ لاندې ژوند کوي. خو د جرمني په حکومت کې د افغان پناه غوښتونکود منلو پر پروګرام د سیاسي اختلافاتو له امله دا بهیر ځنډېدلی و.
وروسته له هغه چې د برلین اداري محکمې پر حکومت فشار راوړ او پاکستان هم د دغو کډوالو د شړلو ګواښ وکړ، جرمني اړ شو چې لومړنی پرواز ترسره کړي.
د بهرنیو چارو وزارت مخکې ویلي و چې د افغان پناه غوښتونکو منل یوازې هغه وخت ترسره کېږي چې د امنیتي اندېښنو راپور نه وي او د ویزې پروسه په بریالیتوب سره بشپړه شي.
د «وېلټ» په نامه یوې بلې ورځپاڼې هم د سهشنبې په ورځ راپور ورکړی چې د افغان پناهغوښتونکود دوسیو د څېړلو بهیر بېرته پیل شوی او د دغه کار لپاره جرمنيخپل کارکوونکي پاکستان ته لېږلي دي.
د خوړو نړۍ وال پروګرام«ډبلیو ایف پي»په خپل تازه اونیز راپور کې د افغانستان د اقتصادي وضعیت نوې څېړنه خپره کړې ده، چې د خلکو د ژوند د سختو ستونزو او د کار موندنې د محدودو فرصتونو تصویر وړاندې کوي.
د راپور پر بنسټ، د ۲۰۲۵کال د اګست میاشتې په څلورمه اونۍ کې د موسمي کارګرو د کار ملي اوسط په اونۍ کې یوازې ۲،۳ورځې و، او د غیر ماهر کارګر ورځنی مزد یوازې ۳۱۵افغانۍ پاتې شوی دی.
دا کچه د اقتصادي بې ثباتۍ او د خلکو د پېر ځواک کمزورتیا په ډاګه کوي.
د خوړو نړۍ وال پروګرام وایي، چې د تېرو ورځو په پرتله د ډېری خوراکي توکو بیې د پام وړ نه دي بدلې شوي، خو ځینې خوراکي توکي لکه وریجې ۱،۱سلنه لوړې شوې دي.
همدارنګه، د تېرو دوو کلونو د منځنۍ کچې پرتله ښيي چې د پخلي غوړ او مالګې بیې ۱۵سلنه، او د وریجو بیې ۸سلنه لوړې شوې دي.
راپور زیاتوي، چې د سبزیجاتو په بیو کې بیا د پام وړ بدلون لیدل شوی؛ د رومي بانجان بیه ۱۱سلنه او د کچالو بیه ۴،۱سلنه لوړه شوې، په داسې حال کې چې د پیازو بیه ۲،۳سلنه راټیټه شوې ده. دغه نوسانات د کورنیو محصولاتو په عرضه او د وارداتي توکو په موجودیت پورې تړل شوي دي.
کارپوهان او اقتصادي څارونکي خبرداری ورکوي چې د کار موندنې محدودیت او د خوړو د بیو لوړېدل د خلکو د ژوند پر کیفیت ناوړه اغېز کوي.
د دوی په باور، که د کارګرو لپاره دایمي دندو ته زمینه برابره نه شي او د خوړو بازارونه نسبي ثبات پیدا نه کړي، نو د افغانستان د خلکو د اقتصادي وضعیت د خرابېدو احتمال به نور هم زیات شي.
د اټومي انرژۍ نړیوالې ادارې مشر «رافایل ګروسي»وایي، چې د "ماشه میکانیزم" فعالېدو سره د دې امکان رد نشي کیدلی چې ایران د دغه ادارې سره همکاري او د دې ادارې پلټونکو ته د اټومي ځایونو لاسرسی اغیزمن کړي، او ایران باید دې پوښتنې ته ځواب ووایی.
نوموړي ټینګار کړی،چې هر وخت باید د دیپلوماټیک حل لاره ولټول شي. هغه د یوه میاشتني فرصت په اړه چې ایران ته د احتمالي بندیزونو د بېرته ستنېدو لپاره ورکړل شوی، وویل چې باید ترې ګټه واخستل شي.
د ګروسۍ په خبره، که د تهران سره داسې چوکاټ جوړ شي چې د اژانس د تفتیش کوونکي ته بېرته د هستوي تاسیساتو د لیدو اجازه ورکړي،او د ۶۰سلنې غني شوي یورانیم په اړه راپورونه وڅېړل شي، ښايي د پراخو بندیزونو د بیا لګولو مخه ونیول شي.
هغه ټینګار وکړ، یوازینۍ نړیواله منل شوې لاره دا ده چې تفتیش کوونکي د ایران هستوي تاسیساتو ته ورشي او د ۶۰سلنه غني شوي یورانیم په اړه وضعیت تایید کړي.
د جرمني د بهرنیو چارو وزیر له خپل پاکستاني سیال سره په ټيلفوني اړیکه کې په پاکستان کې د افغان کډوالو د وضعیت په ګډون پر دوه اړخیزو چارو خبرې کړې دي. د جرمني بهرنیو چارو وزیر ویلي،«په دې خبرو کې په پاکستان کې د افغانانو وضعیت هم شامل وو، موږ دغې موضوع ته هم په جدي توګه پام لرو.»
د جرمني بهرنیو چارو وزارت په خپل اېکس پاڼه کې د دغې ټيلفوني اړیکې په تړاو نور جزییات نه دي ورکړي، خو د پاکستان بهرنیو چارو وزارت بیا د همدې ټيلفوني اړیکې په تړاو ویلي، په دې ټیلفوني خبرو کې دواړو لورو د دوه اړخیزو ګټورو همکاریو پر پراختیا له ټينګار سربېره د سیمې پر روانو چارو هم خبرې کړې دي.
سره له دې چې همدا اوس هم له پاکستانه د افغان کډوالو د اېستنې بهیر دوام لري خو د پاکستان حکومت ټينګار کړی چې د سپټمبر له لومړۍ وروسته به څه باندې ۱ میلیون «پي او ار» کارت لرونکي افغانان هم له دغه هېواده وباسي.
په دې ډله کې له دوه زرو ډېر هغه کسان هم شامل دي، چې جرمني د زیانمنو کسان په توګه منلي وو او د دغه هېواد له خوا په تمویلیدونکو استوګنځایونو کې اوسېږي.
تر دې مخکې په جرمني کې د کډوالو د حقونو ځینو مدافع بنسټونو ویلي، په وروستیو اونیو کې د دې کډوالو له ډلې له ۴۰۰ څخه ډېر کسان د پاکستان پولیسو نیولي او ۳۴ تنه یې افغانستان ته هم اړولي دي.
دغو بنسټونو خبرداری ورکړی، چې ښايي یاد کسان افغانستان ته په ستنېدو سره د زنداني کېدو، شکنجې او یا هم د اعدام له ګواښ سره مخ شي.
همدا دوه ورځې مخکې د ډيپلوماتیکو فشارونو او له پاکستان نه د افغان کډوالو له اېستنې سره هممهاله د جرمني د بهرنیو چارو وزارت له قوله ویل شوي وو، چې برلین د خپلو افغان سیمه ییزو همکارانو د انتقال چارې له سره پیلوي.
د سرچینې په وینا، دا ځل به افغانان د چارټر الوتکو پرځای په سوداګریزو الوتکوکې د دوبۍ او یا د استانبول له لارې جرمني ته ولېږدول شي.
هندي خبري شبکه «سیانان – نیوز ۱۸» په یوه تازه خپور کړي راپور کې وایي، چې د پاکستان له لوري د سهشنبې په شپه ناوخته د افغانستان پر خوست او ننګرهار ولایتونو د «بې پیلوټه الوتکو او توغندیزو بریدونو» ترسره کېدل د طالبانو سره په همغږۍ ترسره شوي دي.
راپور وايي، په دغو بریدونو کې د تحریک طالبان پاکستان«ټي ټي پي» پټنځایونو نښه شوې چې له امله یې د یادې ډلې ددرنې مرګ ژوبلې خبر ورکړل شوی دی.
«سي این این – نیوز۱۸» زیاتوي، په عین حال کې، په دغو بریدونو کې د ملکي وګړو د مرګ ژوبلې راپورونه هم ورکړل شوي، چې په وژل شویو کې ښځې او ماشومان هم شامل دي.
دغه شبکې ته د خوست ولایت یو تن اوسېدونکي ویلي: «لومړی دوه چاودنې واورېدل شوې او وروسته پرله پسې څو کوچنۍ چاودنې هم وشوې.»
د دې پېښې عیني شاهدان وايي، د بریدونو له ترسره کېدو وړاندې یې د خوست په فضا کې ډرون الوتکې ليدلې وې.
په ننګرهار کې د شینوارو ولسوالۍ اوسېدونکي « سي این این – نیوز ۱۸ » ته ویلي، چې په ډرون برید کې یو مرکز چې د تحریک طالبان پاکستان«ټي ټي پي» پورې یې تړاو درلود په بشپړ ډول له منځه تللی، خو په خوست کې د سپيرې ولسوالۍ اوسېدونکي وایي چې په بریدونو کې یوه استوګنیزه حویلۍ په نښه شوې ده.
د ننګرهار ځايي طالب چارواکو د دغه ولایت د شینوارو ولسولۍ په ۲۸ ویاله سیمه کې برید تایید کړی، خو د عامل په اړه یې چوپه خوله دي.
بلخوا د طالبانو دفاع وزارت چې ستر مسوولیت یې د هېواد ساتنه او دفاع ګڼل کېږي، له بریدونو۲۴ ساعته وروسته «ډيپلوماټيک دریځ» ته ورته غبرګون ښودلی دی.
دغه وزارت د یوې اعلامیې په خپرولو سره ویلي، «د افغانستان په خاوره د پاکستاني الوتکو برید چې د ملکي خلکو ښځو او ماشومانو د شهادت سبب شو په کلکه غندو.»
د طالبانو دفاع وزارت دغه بریدونه ظالمانه او له وحشته ډک اقدامات ګڼلي او زیاته کړې یې ده، «داسې د ظلم او وحشت څخه ډک اقدامات د هیچا په ګټه نه دي؛ بلکې د دواړو مسلمانو ملکونو د خلکو ترمنځ د فاصلې پیدا کولو او د دواړو اړخونو ترمنځ د نفرت سبب ګرځي او دغه ډول بېمسوولیته کړنې به پایلې ولري.»
«سي این این – نیوز ۱۸» وایي، چې د اګست په ۲۰مه د پاکستان د بهرنیو چارو وزیر اسحاق ډارد کابل په سفر کې د طالبانو د بهرنیو چارو له وزیر سره لیدلي وو او ویلي یې وو چې د افغان خاورې څخه د پاکستانپر ضد د ترهګرو ډلو د فعالیتونو د مهار لپاره د پام وړ اقدام نه دی ترسره شوي او لا ډیرو اقداماتو ته اړتیا ده.
د یادولو وړ ده، چې د طالبانو بهرنیو چارو وزارت ویلي، چې پر ننګرهار او خوست ولایتونو د پاکستاني پوځ د بریدونو په غبرګون کې یې په کابل کې د پاکستان سفیر احضار او خپل احتجاجلیک یې وروسپارلی دی.
دغه وزارت د یوې اعلامیې په خپرولو سره وایي، چې د پاکستان پوځ د افغانستان هوايي حریم نقض کړی او ډیورنډ کرښې ته څېرمه یې پر ولسي وګړو بمباري کړې ده.
د طالبانو د بهرنیو چارو وزارت ویلي چې د پاکستان له خوا په خوست او ننګرهار کې بمباري د افغانستان د ځمکنۍ بشپړتیا ښکاره نقض او پاروونکی عمل دی.
پاکستان په تېرو کلونو کې هم څو ځلې د افغانستان خاوره په نښه کړې ده، چې د ۱۴۰۳کال د مرغومې په میاشت کې د پکتیکا په برمل ولسوالۍ باندې د پاکستان د هوايي برید له امله لږ تر لږه ۴۶ کسان وژل شوي وو، چې ډېری یې ښځې او ماشومان وو.