د ملګرو ملتونو د ماشومانو د ملاتړ ادارې (یونېسف) د افغانستان په ختیځ کې د وروستۍ زلزلې له امله د درنې مرګ ژوبلې په اړه خپله ژوره اندېښنه څرګنده کړې ده. دغه سازمان په نړۍوالې ټولنې غږ کړی، چې د افغانستان زلزله ځپلو لپاره د مرستو په برابرولو کې فعاله ونډه واخلي.
په افغانستان کې د دغه سازمان استازي ډاکټر تاج الدین اویوالي ویلي: « یونېسف د افغانستان په ختیځ کې د دردونکې مرګ ژوبلې او د دې ناورین له امله رامنځته شویو ویجاړیو له کبله ژور غمجن دی. زموږ فکرونه له هغو ماشومانو او کورنیو سره دي چې خپل و خپلوان او کورونه یې له لاسه ورکړي دي.»
یونېسف ټینګار کړی، چې د ماشومانو او کورنیو د ژوند ژغورنې لپاره یې بېړني اقدامات پیل کړي او همداراز د روغتیايي ټیمونو ترڅنګ د خیمو، کمپلو، پاکو اوبو، درملو او د حفظالصحې اړینو توکو د لېږد چارې هم روانې دي.
د دې ادارې په خبره، د ماشومانو د خوندیتوب، رواني ملاتړ او د لنډمهاله سرپناه برابرول د دوی د غبرګون لومړنۍ موخې دي.
یونېسف زیاته کړې، چې د وضعیت د خرابېدو په صورت کې به د خپلو مرستو کچه نوره هم لوړه کړي، څو د اغېزمنو شویو کورنیو اړتیاوې په بېړه پوره شي.
د یونېسف په وینا، اوس مهال د ماشومانو ژوند او راتلونکی له جدي ګواښ سره مخ دی او نړۍواله ټولنه باید د افغانستان د زلزله ځپلو لپاره د مرستو په برابرولو کې فعاله ونډه واخلي.
