د طالبانو د بهرنیو چارو وزارت سرچینې وايي، په روسیه کې د دوی ډیپلوماټانو د تېر نظام د پخواني پوځي، چې په بېلاروس کې شکنجه شوی او لاس یې غوڅ شوی و، روغتیايي لګښتونه پرغاړه اخېستي او روغتون ته د پوښتنې لپاره ورغلي دي.
طالبانو ته نژدې رسنۍ حریت راډیو نن دوشنبه، د تلی ۱۳مه راپور ورکړ، چې درې اونۍ وړاندې د طالبانو د بهرنیو چارو وزیر په لارښوونه په بېلاروس کې د طالبانو پلاوی د دغه افغان ناروغ لیدو ته ورغلی او د درملنې ټول امکانات یې ورته برابر کړي دي.
د یادې سرچینې په وینا، د ناروغ له کورنۍ سره اړېکه نیول شوې او په مسکو کې د افغانستان سفارت ته دنده سپارل شوې چې دغه ناروغ په نږدې وخت کې خپل هېواد ته ولېږدوي.
یوه پخواني افغان افسر چې غوښتل یې په قاچاقي لارو اروپا ته ولاړ شي، ویلي چې په بېلاروس کې د پولیسو د سختې شکنجې او وهلو له امله یې ښی لاس له اوږې پرې شوی، خو ځینې سرچینې وايي، چې د نوموړي لاس لاس د ناروغۍ له امله پرې شوی دی.
نوموړي تېره ورځ، د تلې ۱۳مه، افغانستان انټرنشنل–پښتو ته وویل: «زه جنګي اسیر نه وم، یو پناه غوښتونکی وم، خو هغوی مې ژوند تباه کړ.»
په افغانستان کې د طالبانو له بیا واکمنېدو راهیسې د تېر جمهوري نظام ډېریو لوړپوړو او ټيټ پوړو او په ځانګړې توګه نظامیانو د طالبانو د غچ اخیستنې له وېرې په نورو هېوادونو کې پناه غوښتنې ته مخه کړې ده، چې ډېر کم یې خپل مقصد ته ورسېدل او ډېری یې یا د لارې په اوږدو کې قرباني شول او یا بندیان او بېرته هېواد ته ستانه کړای شوي دي.
دغه افغان افسر وویل، چې هره لحظه د بېلاروس د پولیسو د شکنجه کولو صحنه یې مخې ته دریږي.
۳۳ کلن جهاد محمد د ګل نواب زوی واده کړی او دوه لوڼې هم لري.
