د خیبر پښتونخوا حکومت اعلان کړی، د روانې نومبر میاشتې په ۱۲مه به د سولې یوه پراخه جرګه راوغواړي چې پهکې به د سیاسي ګوندونو مشران، ایالتي پخواني سر وزیران، مدني فعالان او وکیلان د امنیتي وضعیت او دایمي سولې د تګلارو پر سر سلامشورې وکړي.
د سولې جرګې د جوړېدو پرېکړه د د ایالتي مجلس له لوري د روانې میاشتې په پیل کې د جوړې شوې ځانګړې پارلماني کمېټې په لومړۍ ناسته کې وشوه. دغه کمېټه د سولې او د ترهګرۍ ضد هڅو د همغږۍ لپاره رامنځته شوې ده.
د خیبر پښتونخوا سر وزیر سهېل اپریدي په مشرۍ غونډه کې پرېکړه وشوه، چې په دغه ایالت کې د دایمي سولې لپاره د ټولو سیاسي، ټولنیزو او حقوقي ډلو ترمنځ خبرې اترې ضروري دي.
په تعقیبي ناسته کې چې ډېری غړي یې د پاکستان تحریک انصاف ګوند استازي وو؛ پرېکړه وشوه چې د سولې جرګه به د نومبر په ۱۲مه وشي او ټولو سیاسي ګوندونو ته به د ګډون بلنه ورکړي.
د کمېټې غړي عرفان سلیم ویلي، د یادې جرګې موخه دا ده چې د خېبر پښتونخوا ټول سیاسي مشران د یوه ګډ دریځ له مخې د تلپاتې سولې او ثبات لپاره سره راټول شي. هغه زیاته کړه: «بلنې به ټولو ایالتي ګوندونو، مشرانو، عمومي منشيانو، د مدني ټولنې استازو او د خېبر پښتونخوا د وکیلانو ټولنې ته استول کېږي.»
سرچینو تایید کړې، چې سر وزیر سهېل اپریدی به له جرګې وړاندې له پخوانیو والیانو او سر وزیرانو سره جلا، جلا ناستې وکړي؛ څو د هغوی وړاندیزونه د مجلس په غونډه کې د بحث لپاره وړاندې کړي.
