ډونالډ ټرمپ د بېجینګ د سفر لپاره د چین بلنه ومنله
د امریکا ولسمشر ډونالډ ټرمپ ویلي، چې د ۲۰۲۶ کال په اپرېل میاشت کې د بېجینګ د سفر لپاره یې د چین د ولسمشر شي جینپینګ بلنه منلې ده او هغه ته یې هم امریکا ته د سفر رسمي بلنه ورکړې ده.
د امریکا ولسمشر ډونالډ ټرمپ ویلي، چې د ۲۰۲۶ کال په اپرېل میاشت کې د بېجینګ د سفر لپاره یې د چین د ولسمشر شي جینپینګ بلنه منلې ده او هغه ته یې هم امریکا ته د سفر رسمي بلنه ورکړې ده.
ټرمپ د دوشنبې په ورځ (د لیندۍ ۳مه) پر «ټروث سوشال» لیکلي، چې د چین له ولسمشر سره یې د اوکراین د جګړې، له روسیې سره د اړیکو، د فینټانیل د ناورین او د کرنیزو محصولاتو د سوداګرۍ په ګډون یې د یو شمېر مهمو موضوعاتو په اړه «ښې خبرې» کړې دي.
ټرمپ وویل، چې په دې ټلیفوني خبرو کې د امریکایي کروندګرو لپاره مهمه هوکړه وشوه او ژمنه یې وکړه، چې دا به «لا هم ښه» شي.
نوموړي ټینګار وکړ: «د امریکا او چین اړیکې ډېرې پیاوړې دي.» د ټرمپ په وینا، دا اړیکه د درې اوونۍ وړاندې په سوېلي کوریا کې د دواړو مشرانو د حضوري لیدنې دوام دی. نوموړي هغه لیدنه «ډېره بریالۍ» وبلله او زیاته یې کړه، چې له هغه راهیسې د دواړو هېوادونو د ژمنو په پلي کولو کې «ستر پرمختګونه» شوي دي.
ټرمپ وویل، چې واشنګټن او بېجینګ پر دې موافق دي چې «دوامداره اړیکې» ډېر اهمیت لري او نوموړی د دغو خبرو د دوام لېوالتیا لري.
د چین دولتي خبري اژانس هم لیکلي، چې په دې خبرو کې شي جینپینګ یو ځل بیا ټینګار کړی چې بېجینګ د هغو ټولو هڅو ملاتړ کوي، چې د اوکراین جګړه پای ته رسوي او له ټولو اړخونو یې غوښتي چې خپل اختلافات راکم کړي.
