د ایران د بهرنیو چارو وزارت د امریکا د ولسمشر لهخوا د ونزویلا د هوايي حریم د تړل کېدو اعلان د نړۍوالو قوانینو څرګنده سرغړونه بللې او ټینګار یې کړی، چې دا پرېکړه د نړۍوالې هوانوردۍ د امنیت او خونديتوب لپاره بېساری ګواښ دی.
د ایران د بهرنیو چارو وزارت ویاند اسماعیل بقایي د شنبې په ورځ (د لیندۍ ۸مه) د یوې خبرپانې په خپرولو سره ویلي، چې د امریکا دا کړنه د دې هېواد لهخوا د ونزویلا د ملي حاکمیت او ځمکنۍ بشپړتیا پر ضد د تحریک کوونکو او غېرقانوني کړنو په دوام کې اخیستل شوی او «خپلسری او غېرمسوولانه اقدام» دی.
هغه خبرداری ورکړ، چې د امریکا دا اقدام به د قانون د حاکمیت، نړۍوالې سولې او امنیت لپاره خطرناکې پایلې ولري.
د ایران د بهرنیو چارو وزارت دا څرګندونې په داسې حال کې کوي، چې په ونزویلا کې د احتمالي خطرناک وضعیت له امله شپږو نړۍوالو هوايي شرکتونو خپلې الوتنې د ونزویلا پر لور ځنډولي دي. د امریکا فدرالي هوايي چلند ادارې تېره ورځ هوايي شرکتونو ته خبرداری ورکړی و، چې د ونزویلا په هوایي حریم کې احتمالي ګواښ شته.
تر دې وړاندې، د ونزویلا د هوايي شرکتونو ټولنې اعلان کړی و چې یادو شپږو شرکتونو چې د کولمبیا، پرتګال او هسپانیا شرکتونه هم پکې شامل دي د امریکا د پوځي فعالیتونو د زیاتوالي د خبرداري وروسته خپلې الوتنې ځنډولې.
د امریکا ولسمشر ډونالډ ټرمپ هم په ټولنیزو شبکو کې ویلي، چې د ونزویلا هوایي حریم او شاوخوا سیمې باید د نشهیي توکو او انساني قاچاق د مخنیوي لپاره تړل شوي وګڼل شي.
