د ترکیې د دیاربکر ښار پولیسو ۳۲ افغان کډوال چې د فاضله موادو د یوه ټانکر په پټو برخو کې پټ شوي وو، پېژندلي او نیولي دي. پولیسو پنځه کسان د انساني قاچاق د تنظیم کولو په تور هم نیولي دي.
د دیاربکر ښار پولیسو د جمعې په ورځ، د مرغومي پر ۱۲مه د عملیاتو په جریان کې یو موټر او د هغې سره تړلي د فاضله موادو یو شکمن ټانکر ودراوه.
د څېړونو په جریان کې پولیسو وموندله چې غیرقانوني افغان کډوال د ټانکر دننه په جوړو شوو پټو برخو کې پټ وو.
ترکي پولیسو افغان کډوال له ټانکر څخه را واېستل او د طبي معایناتو او اداري پروسیجرونو بشپړولو وروسته یې د بهرنیو وګړو د ستنیدو مرکز ته لېږلي دي.
د ترکیې په مختلفو ښارونو کې د افغان کډوالو د نیولو او شړلو پروسه دوام لري.
د مرغومي په لومړیو کې د ترکیې د کډوالو بورډ اعلان وکړ، چې په تیر کال کې له ۱۵۲ زره څخه ډیر بې اسناده پناه غوښتونکي چې ۴۲ زره افغانان هم پکې شامل دي نیول شوي دي.
د ادارې د احصایو له مخې افغانان د ترکیې د حکومت لخوا د نیول شویو کډوالو په نوملړ کې لومړی ځای لري.
