د ملګرو ملتونو د ماشومانو صندوق (یونیسف) له هېوادونو وغوښتل چې د مصنوعي ځیرکتیا له لارې د ماشومانو د جنسي ناوړه استفادې اړوند د محتوا تولید په قانوني ډول جرم وګرځوي. یونیسف خبرداری ورکړی چې دا ډول محتوا د ماشومانو امنیت او رواني روغتیا ته جدي ګواښ پېښوي.
یونیسف د چارشنبې په ورځ، د سلوغې په ۱۵مه، په خپره شوې اعلامیه کې وویل چې تر اوسه د نړۍ په ۱۱هېوادونو کې د ۱،۲میلیون ماشومانو انځورونه د مصنوعي ځیرکتیا د پروګرامونو لهخوا د جنسي محتوا د تولید لپاره کارول شوي دي.
یاد سازمان د مصنوعي ځیرکتیا له جوړوونکو او ډیجیټلي شرکتونو وغوښتل چې د دغسې محتوا پر تولید سخت کنټرول ولري، د څارنې میکانیزمونه پیاوړي کړي او د تشخیص پرمختللې ټکنالوژۍ وکاروي څو د ماشومانو د ایډیټ شویو انځورونو د خپرېدو مخه ونیول شي.
د یونیسف په وینا، د «ډیپفیک» په نوم مصنوعي انځورونه، ویډیوګانې او غږونه د دې توان لري چې د واقعي خلکو څېرې په ډېر قانع کوونکي ډول جعل کړي، چې دا چاره د ماشومانو لپاره ژور او اوږدمهاله زیانونه رامنځته کوي.
په اعلامیه کې راغلي: «د ډیپفیک له ناوړه استفادې څخه رامنځته کېدونکی زیان ریښتینی، جدي او سملاسي دی. ماشومان نه شي کولای تر هغه وخته انتظار وباسي چې قوانین ورپسې جوړ شي».
په همدې حال کې، بریتانیا اعلان کړی چې د مصنوعي ځیرکتیا د هغو وسایلو کارول به غیرقانوني اعلان کړي چې د ماشومانو د جنسي ناوړه استفادې انځورونه تولیدوي. بریتانیا په دې برخه کې لومړنی هېواد بلل کېږي چې عملي قانوني ګام اخلي.
په وروستیو کې دا اندېښنې هم زیاتې شوې چې د مصنوعي ځیرکتیا ځینې سیستمونه، لکه «ګروک» او «اکساې ای» چې په امریکايي میلیاردر ایلان ماسک پورې تړاو لري، د کاروونکو له مخالفت سربېره هم دا ډول محتوا تولید کړې ده.
د ملګرو ملتونو سرمنشي انتونیو ګوترش مخکې اعلان کړی و چې د مصنوعي ځیرکتیا د تنظیم لپاره یې د ۴۰ کسانو په ګډون د یوې خپلواکې نړیوالې علمي شورا د جوړېدو وړاندیز کړی، څو د دې ټکنالوژۍ کارول د بشریت د ګټو پر بنسټ تنظیم شي.
