د ناټو سرمنشي: له ۲۰ ډېر هېوادونه په دې کار کوي چې هرمز تنګی پرانېستی وساتل شي
د ناټو سرمنشي مارک روټه وايي، د دغه پوځي تړون له شلو زیات غړي هېوادونه دا مهال په ګډه کار کوي چې هرمز تنګی پرانیستی وساتل شي. دغه تنګی د نړیوالو کښتیو لپاره حیاتي لاره ګڼل کیږي.
هغه په یوه مرکه کې ټینګار کړی چې دا همکاري د امریکا د ولسمشر له لیدلوري سره سمه روانه ده او موخه یې دا ده چې د انرژۍ او سوداګرۍ نړیوال بهیر له خنډ سره مخ نه شي.
نوموړي زیاته کړه چې په تېره یوه اونۍ کې یې څو ځله له امریکايي چارواکو سره خبرې کړې دي او د امریکا احتمالي پوځي اقدام یې مهم بللی، ځکه د هغه په وینا، د ایران اټومي او توغندیز پروګرامونه د نړۍ لپاره جدي ګواښ ګڼل کېږي.
هغه د امریکا او د ناټو د نورو غړو ترمنځ د اختلافاتو راپورونه هم رد کړل او ویې ویل چې دا یوازې د ځینو هېوادونو پر فعالیت د نارضایتۍ څرګندونه ده، نه دا چې ژور اختلافات موجود وي.
