د اروپایي ټولنې د بهرني سیاست مسوولې له عراقچي سره د منځني ختیځ د جګړې په اړه خبرې وکړې
د اروپایي ټولنې یوه چارواکي رویټرز خبري اژانس ته ویلي، چې د دغې ټولنې د بهرني سیاست مسوولې کایا کالاس د ایران د بهرنیو چارو له وزیر عباس عراقچي سره ټلیفوني خبرې کړې دي.
هغه اشاره وکړه، چې کالاس د ترکیې، قطر او سوېلي کوریا د بهرنیو چارو له وزیرانو سره هم جلا جلا اړیکې نیولي او «په منځني ختیځ کې د جګړې، د انرژۍ پر زېربناوو د بریدونو او د هرمز تنګي د بېرته پرانیستلو پر بېړنۍ اړتیا» یې ورسره خبرې کړې دي.
دغه اروپایي چارواکي وویل: «دا اړیکې د ډیپلوماټیکو لارو د لټولو لپاره د اروپایي ټولنې د روانو هڅو یوه برخه وه».
نوموړي زیاته کړه، چې «د ملکي حیاتي زېربناوو پر وړاندې د بریدونو نوي ګواښونه په منځني ختیځ او له هغه هاخوا په میلیونونو خلک اغېزمنوي».
