ایران ویلي چې که د امریکا ولسمشر د دوی د انرژۍ تاسیساتو له منځه وړو په تړاو خپل ګواښونه عملي کړي، هرمز تنګی به په بشپړه توګه وتړي. ټرمپ ویلي و چې که ایران هرمز تنګی په ۴۸ ساعتونو کې په بشپړه توګه خلاص نه کړي، د برېښنا فابریکې به یې له منځه یوسي.
د ایران سپاه پاسداران د یکشنبې ورځ وویل چې که د ایران د انرژۍ پر تاسیساتو برید وشي، هغه شرکتونه به هم په نښه کړي، چې امریکایي شریکان لري.
مشهوره پاکستانۍ ټیکټاکره ثنا جاوید د یکشنبې په ورځ په اسلام اباد کې په ډزو ووژل شوه. پولیسو وویل، چې شکمن وژونکي محمد صادق، چې د ثنا میړه و، هم د پېښې په ځای کې ځانوژنه کړې ده.
د راپورونو له مخې د پښتو ژبې ټیکټاکره د خیبر پښتونخوا ایالت د اټک اوسیدونکې وه.
هغه په ټیک ټاک کې له ۱.۲ میلیون څخه زیاتو پلویانو سره فعاله وه.
مېرمن ثنا ځینې وختونه په خپلو ویډیوګانو کې د افغانستان په ملي بیرغ جامو سره هم راښکاره کېده.
په ویډیو کې لیدل کیږي، چې د نوموړې خاوند له کوره راوځي او له موټر سره پر هغې ډزې کوي او په داسې حال کې، چې خواوشا یې ماشومان دي، وروسته خپله هم ځان وژني.
د اسلام اباد پولیسو وویل، چې دوی د پیښې له ځای څخه درې کارتوس او یوه تومانچه ترلاسه کړي دي.
چارواکو وویل، چې د ثنا میړه چې په اټک کې یو پخوانی پولیس افسر و، له وړاندې له دندې ګوښه شوی و.
ویل کیږي، چې دا پیښه د اسلام اباد په (اېچ ۱۱) سیمه کې د پولیسو مرکز ته نږدې شوې ده.
د ناټو سرمنشي مارک روټه وايي، د دغه پوځي تړون له شلو زیات غړي هېوادونه دا مهال په ګډه کار کوي چې هرمز تنګی پرانیستی وساتل شي. دغه تنګی د نړیوالو کښتیو لپاره حیاتي لاره ګڼل کیږي.
هغه په یوه مرکه کې ټینګار کړی چې دا همکاري د امریکا د ولسمشر له لیدلوري سره سمه روانه ده او موخه یې دا ده چې د انرژۍ او سوداګرۍ نړیوال بهیر له خنډ سره مخ نه شي.
نوموړي زیاته کړه چې په تېره یوه اونۍ کې یې څو ځله له امریکايي چارواکو سره خبرې کړې دي او د امریکا احتمالي پوځي اقدام یې مهم بللی، ځکه د هغه په وینا، د ایران اټومي او توغندیز پروګرامونه د نړۍ لپاره جدي ګواښ ګڼل کېږي.
هغه د امریکا او د ناټو د نورو غړو ترمنځ د اختلافاتو راپورونه هم رد کړل او ویې ویل چې دا یوازې د ځینو هېوادونو پر فعالیت د نارضایتۍ څرګندونه ده، نه دا چې ژور اختلافات موجود وي.
د پاکستان د کرکټ کورنۍ سیالۍ «سوپرلیګ» د منځني ختیځ وضعیت او سون توکو د بحران له امله له نندارچیانو پرته یوازې په دوو ښارونو، کراچۍ او لاهور کې، ترسره کیږي. د پاکستان د کرکټ بورډ مشر محسن نقوي اعلان وکړ، چې مینه وال کولای شي د خپلو ټکټونو پیسې بېرته واخلي.
په لاهور کې د سیالۍ د پرانیستې مراسم هم لغوه شوي او د کوربه لوبغالو شمیر له شپږو څخه دوو ته راټیټ شوی دی.
محسن نقوي په یوه خبري کنفرانس کې وویل:«مینه وال کولی شي خپل ټکټونه [د ټکټونو پیسې] بیرته ترلاسه کړي او موږ د دې ستونزې لپاره له دوی څخه بښنه غواړو. موږ هیله لرو چې په سیمه کې وضعیت ژر تر ژره عادي شي.»
نقوي، چې د پاکستان د کورنیو چارو وزیر هم دی زیاته کړه چې دا پریکړه په لیګ کې له ګډون کوونکو ټیمونو سره له مشورې وروسته شوې ده.
هغه دا هم وویل، چې د پاکستان لومړي وزیر شهباز شریف له خلکو غوښتي چې د سون توکو د بحران له امله خپل حرکتونه محدود کړي. د دې لپاره، ښوونځي تړل شوي، له کوره کار زیات شوی او د اختر رخصتۍ غځول شوې دي.
نقوي وویل: «له همدې امله، تر هغه چې دا بحران دوام ولري، لوبې به له نندارچیانو پرته ترسره شي.»
هغه ټینګار وکړ، چې د ټیمونو د تګ راتګ کمولو لپاره به د لوبو مهالویش ساده شي او زیاته یې کړه:«موږ نه پوهیږو چې دا وضعیت به څومره دوام وکړي، مګر دا اړینه ده چې دا لیګ ترسره شي. دا یو نړیوال برانډ دی او بهرني لوبغاړي پکې دي. که موږ سیالۍ وځنډوو، نو په راتلونکي کې به یې د ترسره کولو لپاره مناسب وخت نه وي.»
روسیې اعلان کړی چې له «بایکونور فضایي مرکز» څخه یې یو توغندی فضا ته واستاوه او په دې توګه یې نړیوال فضایي تمځي ته د تګ وړتیا بېرته ومونده. دا لومړی ځل دی چې دغه مرکز دتېر کال له زیانمنېدو وروسته بیا کار ته چمتو کیږي.
د رویټرز د راپور له مخې، یو باروړونکی توغندی چې اکمالاتي بېړۍ یې لېږدوله، په بریالیتوب سره فضا ته وتوغول شو او ټاکل شوې چې څو ورځې وروسته له نړیوال فضایي تمځي سره ونښلي. دغه فضايي بېړۍ خوراکي توکي، سون توکي او نور اړین وسایل له ځان سره لېږدوي.
دغه توغندویي مرکز تېر کال د یوې پېښې له امله سخت زیانمن شوی و.
هغه مهال یو بل توغندي چې درې ستورمزلي یې لېږدول، د توغېدو پر مهال ستونزه رامنځته کړه.
که څه هم عمله خوندي پاتې شوه، خو د توغولو ځای له کاره ولوېد او روسیه یې د څو میاشتو لپاره له مهمو فضایي امکاناتو بې برخې کړه.
کارپوهان وایي چې د دې مرکز بېرته فعالېدل د روسیې لپاره مهم پرمختګ دی.
د اسراییل په جنوبي سیمو کې د یکشنبې سهار خلکو د پراخې ویجاړۍ په حال کې سترګې پرانیستې. د ایران توغول شوي توغندي له دفاعي سیستمونو تېر شول او خپلو هدفونو ته ورسېدل. دغه بریدونه د روانې جګړې له تر ټولو سختو پېښو ګڼل کېږي.
د راپورونو له مخې، په اراد ښار کې یو توغندی پر یوه څو پوړیزه استوګنیزه ودانۍ ولګېد، چې له امله یې د ودانۍ ځینې پوړونه په بشپړه توګه ویجاړ شول. د پېښې له ځایه ترلاسه شوي انځورونه ښيي چې اور د ودانۍ پورته پوړونه نیولي وو او د ژغورنې ډلې د ژوندي پاتې کسانو په لټون پسې پوړ په پوړ ګرځېدې.
چارواکي وایي چې لږ تر لږه اته ودانۍ زیانمنې شوې دي او د چاودنې له امله یوه لویه کنده هم رامنځته شوې ده. په همدې ښار کې ۳۱ کسان، چې ۱۸ یې ماشومان دي، روغتون ته لېږدول شوي او لږ تر لږه ۹ یې جدي ټپیان دي.
د اسراییل لومړي وزیر بنیامین نتنیاهو ویلي چې دا «یوه معجزه» ده چې په دغه برید کې څوک نه دي وژل شوي. هغه ټینګار کړی چې که خلک پر وخت خوندي ځایونو ته تللي وای، نو ټپيان به هم نه وو.
نوموړی ګواښ کړی، چې د ایران د سپاه پاسداران او نورو ادارو مشران به په نښه کړي.
بل ښار دیموناهم د توغندیز برید هدف ګرځېدلی، چې هلته پنځه کسان ټپیان شوي دي.