واشنګټنپوسټ ورځپاڼې د څو ایراني او اروپايي چارواکو او یوه جګپوړي عربي مقام له قوله لیکلي، چې تهران د هغې جګړې د پای ته رسولو لپاره د ډیپلوماټیکې لارې موندلو هڅې رد کړې دي، چې د امریکا او اسراییل له خوا پیل شوې ده.
یادې ورځپاڼې زیاته کړې، چې ایران پر ګاونډیو هېوادونو خپل بریدونه ګړندي کړي او باور لري چې کولای شي د نړۍ اقتصاد ته د امریکا د رغونې له سرعت څخه په تېزه کچه ضربه ورسوي.
واشنګټنپوسټ د یوه ایراني ډیپلوماټ له قوله لیکلي، چې د ایران حکومت د هرمز تنګي په تړلو سره هڅه کوي، چې «د تېري کوونکو تېری» هغوی ته «خورا ګران» تمام کړي.
بلخوا، په خلیج کې مېشت یوه اروپايي ډیپلوماټ واشنګټنپوسټ ته ویلي: «تر څو چې دا حکومت پر پښو ولاړ وي، په سیمه کې به وېره خپروي او د تېلو او ګازو د بیو له لارې به نړۍوال بازارونه له اضطراب سره مخ کوي».
هغه زیاته کړه، چې دا اقدامات د اسلامي جمهوریت لپاره «د بریا په معنا» دي او هغوی د خبرو اترو مېز ته د ستنېدو لپاره هېڅ فشار نه احساسوي.
دغه ډیپلوماټ له ایران سره د امریکا او اسراییل د جګړې اقتصادي پایلې د متحده ایالاتو او د هغوی د اروپايي متحدینو لپاره «منځنۍ» وبللې او ټینګار یې وکړ، چې دا فشار لا تر اوسه هغه بحراني حد ته نه دی رسېدلی چې په امریکایي لوري کې د مذاکرې لپاره فشار زیات کړي.
د یوه اروپايي چارواکي په وینا چې پخوا په ایران کې مېشت و، داسې ښکاري چې د اسلامي جمهوریت د جګپوړو چارواکو پرلهپسې وژل کېدو په تهران کې مذاکراتو ته د ننوتلو انګېزه کمه کړې ده. هغه وویل، چې په ځانګړي ډول د علي لاریجاني وژل کېدو د خبرو اترو لرلید کمزوری کړی، ځکه هغه له هغو محدودو کسانو څخه و چې له لوېدیځ سره یې د تعامل وړتیا لرله.
واشنګټنپوسټ د یوه عربي مقام او څو اروپايي ډیپلوماټانو له قوله لیکلي، چې د قطر او عمان چارواکو تېره اوونۍ وروسته له هغه له تهران سره د اوربند د امکان په اړه تماسونه نیولي، چې دې پایلې ته ورسېدل چې د امریکا او اسراییل پراخ پوځي ځواک به په لنډمهال کې د ایران د حکومت په راپرځولو قادر نه وي.
اسلامي جمهوریت په ځواب کې ویلي، یوازې هغه مهال خبرو ته چمتو دي چې امریکا او اسراییل لومړی خپل بریدونه ودروي.
