د روغتیا سازمان مشر: جګړه سوله نهراولي بلکې راتلونکي نسل ته د کرکې نوي لاملونه ور زدهکوي
د روغتیا نړۍوال سازمان مشر ټيډرس ادهانوم په منځني ختیځ کې روانې جګړې ته په اشاره ویلي، جګړه سوله نهراولي، بلکې دا یوازې راتلونکي نسل ته د کرکې نوي لاملونه ور زدهکوي. هغه د مخاطب له څرګندولو پرته ویلي: «سوله غوره کړئ».
ټيډرس ادهانوم د یکشنبې په ورځ (د وري ۲مه) په خپله اېکسپاڼه ویلي، په منځني ختیځ کې جګړه یوه خطرناک پړاو ته رسېدلې او په وینا یې داسې راپورونه ورکړل شوي، چې په ایران کې د نطنز د غني کولو پر مرکز او د اسراییل په دیمونا ښار کې چې اټومي تاسیسات پهکې موقعیت لري، بریدونه شوي دي.
د اټومي انرژۍ نړۍوال اژانس د هغو پېښو په اړه څېړنه کوي، چې پرون د ایران په سوېل ختیځ او د اسراییل په دیمونا ښار کې راپور شوې وې. تر اوسه له ساحې بهر د غېر نورمال یا لوړې وړانګې د کچې هېڅ نښې نهدي لیدل شوي.
د روغتیا نړۍوال سازمان مشر زیاتوي: «پر اټومي سایټونو بریدونه د عامې روغتیا او چاپېریالي خوندیتوب لپاره مخ په زیاتېدونکي ګواښونه رامنځته کوي».
هغه وايي، د ایران، امریکا او اسراییل تر منځ د جګړې له پیل راهیسې د اټومي پیښې په صورت کې د عامې روغتیا له ګواښونو سره په اغېزناکه توګه د مبارزې په موخه د روغتیا نړۍوال سازمان په ۱۳ هېوادونو کې خپلو کارمندانو او د ملګرو ملتونو کارکوونکو ته لازمې روزنې ورکړې دي.
نوموړي د خپل پیغام په پای کې ویلي: «زه له ټولو خواوو په کلکه غوښتنه کوم چې تر ټولو زیاته نظامي زغم وښیې او له هر هغه اقدام څخه ډډه وکړي چې د اټومي پېښو لامل کېدای شي. مشران باید د کړکېچ کمولو ته لومړیتوب ورکړي او د ملکي وګړو ساتنه وکړي».
د روغتیا د نړۍوال سازمان د مشر دغه څرګندونې په داسې حال کې دي، چې له شاوخوا درېیو اوونیو راهیسې د ایران، امریکا او اسراییل تر منځ جګړه روانه ده.
