نتنیاهو د نړۍ هېوادونه د ایران پر وړاندې جګړه کې ګډون ته راوبلل
د اسراییل لومړي وزیر بنیامین نتنیاهو پر ډیهګو ګارسیا اډې د ایران وروستي توغندیز برید ته په اشارې له نړۍوالې ټولنې په ځانګړي ډول له اروپایي هېوادونو وغوښتل، چې د ایران د حکومت پر وړاندې په پوځي مبارزه کې برخه واخلي.
نتنیاهو د یکشنبې په ورځ (د وري ۲مه) وویل: «هغوی د ډیهګو ګارسیا په لور یو لېږدونکی (قارهپیما) بالسټیک توغندی وتوغاوه. اوس هغوی دا وړتیا لري چې د اروپا ژورو سیمو ته هم ورسېږي».
نوموړي زیاته کړه، چې یو شمېر هېوادونه د ایران پر وړاندې له دغې مبارزې سره د یو ځای کېدو په حال کې دي، خو د هغوی د نومونو او احتمالي ګډون د څرنګوالي له ښودلو یې ډډه وکړه.
د اسراییل لومړي وزیر په دوام کې وویل: «نورو اقداماتو ته اړتیا ده. اوس د دې وخت دی چې د نورو هېوادونو مشران هم [له دې عملیاتو] سره یو ځای شي.» نتنیاهو دا څرګندونې د عراد ښار هغو سیمو ته د کتنې پر مهال وکړې، چې د اسلامي جمهوریت توغندي پرې لګېدلي وو.
د وري په لومړۍ نېټه ماښام مهال د اسراییل په سوېل کې پر دوو ښارونو (عراد او دیمونا) د ایران توغندیزو بریدونو شاوخوا ۱۵۰ تنه ټپیان کړل، چې د ځینو روغتیايي حالت نازک ښودل شوی دی.
والسټریټ ژورنال ورځپاڼې د وري په لومړۍ نېټه راپور ورکړ، چې له ایران څخه د هند په بحر کې د امریکا او برېتانیا پر پوځي اډې (ډیهګو ګارسیا) دوه بالسټیک توغندي وتوغول شول، خو دا برید ناکام و او توغندي په هدف ونه لګېدل.
د برېتانیا د بهرنیو چارو وزیرې ایوټ کوپر پر ډیهګو ګارسیا د ایران د حکومت توغندیز برید وغانده او په ورته وخت کې یې وویل، چې برېتانیا نه غواړي په یوه پراخه جګړه کې ښکېل شي. هغې زیاته کړه، چې د برېتانیا د حکومت دریځ «دفاعي» بڼه لري او لندن لا هم په سیمه کې د شخړې د چټک پای ته رسېدو غوښتونکی دی.
دا په داسې حال کې ده، چې په وروستیو ورځو کې ډونالډ ټرمپ په وار وار د اسلامي جمهوریت پر وړاندې په پوځي مبارزه کې د واشنګټن د متحدینو پر نه ملګرتیا نیوکه کړې ده.
د ټایمز اسراییل خبري پاڼې د وري په ۲مه خبر ورکړ، چې پر ډیهګو ګارسیا برید وښودله چې د اسلامي جمهوریت د ځینو توغندیو واټن تر پخوانیو اټکلونو ډېر زیات دی.
