روسیې د بالتیک سمندر په مهمو بندرونو پریمورسک او اوست لوګا کې د ډرون بریدونو له امله د اومو نفتو او سون توکو صادرات درولي. رپوټونه وايي، چې دا کار د انرژۍ پر نړیوال بازار فشار نور هم ډېروي.
د راپورونو له مخې، د روسیې د نفتو دوو سترو صادراتي بندرونو، پریمورسک او اوست لوګا، د یکشنبې راهیسې د نفتو او سون توکو صادرات ځنډولي دي. سرچینو ویلي چې دا پرېکړه وروسته له هغې وشوه چې پر دغو سیمو ډرون بریدونه ترسره شول.
د لیننګراد سیمې والي الکساندر دروزدنکو ویلي چې په پریمورسک کې د تېلو څو زیرمې د بریدونو له امله اور اخیستی، خو د صادراتو د درېدلو په اړه یې څه نه دي ویلي. تر اوسه روښانه نه ده چې اوست لوګا بندر ته زیان اوښتی که نه.
د معلوماتو له مخې، پریمورسک هره ورځ تر یو میلیون بېرله زیات نفت صادروي، او اوست-لوګا تېر کال نږدې ۳۲.۹ میلیونه مټریک ټنه نفتي محصولات صادر کړي دي.
دا پرمختګ په داسې حال کې رامنځته کېږي چې د منځني ختیځ جګړې او د هرمز تنګي تړل کېدو له امله نړیوال بازار له مخکې د انرژۍ له کمښت سره مخ دی.
