اسوشېټېډ پرېس: د جګړې په دوام سره د امریکا د اومه تېلو بیې لا هم بې‌ثباته دي

مارک روټه د ایران پر وړاندې د امریکا د ولسمشر ډونالډ ټرمپ له اقدام څخه د ملاتړ ترڅنګ هغه یې اړین وباله او د عامه ملاتړ غوښتنه یې هم وکړه.

هغه وویل: «زه هیله‌مند یم چې د امریکا ولس له هغه [ټرمپ] څخه ملاتړ وکړي، ځکه چې هغه دا کار د ټولې نړۍ د امنیت لپاره کوي».

روټه زیاته کړه، د ناټو له غړو هېوادونو هم تمه کېږي چې له ټرمپ څخه ملاتړ وکړي او ان که همغږي لږه ځنډنۍ هم شي.

هغه همداراز په ډاګه کړه: «موږ په بشپړه توګه ډاډمن یو چې د هرمز تنګي پر بیا پرانېستلو به بریالي شو او د دې لپاره پلان جوړونه له وړاندې پیل شوې ده».

هغه څرګنده کړه، پر دې هم پوهېږي چې ټرمپ د پروسې له اوږدېدو ناخوښ دی، خو یو ځل بیا یې له نورو وغوښتل چې وضعیت درک کړي، ځکه نور هېوادونه باید له مخکینۍ خبرتیا پرته ځانونه دې موضوع ته چمتو کړي وای.

د شمالي کوریا دولتي رسنۍ ویلي، د دغه هېواد د ولسي اسمبلۍ لومړۍ غونډه د یکشنبې په ورځ (د وري ۲مه) پیل شوه او په یاده غونډه کې به په سوسیالیستي اساسي قانون کې پر تعدیلاتو او زیاتونو او همدارنګه د دولتي چارو د کمېسیون د ريیس او نورو دولتي مشرانو پر ټاکلو بحث وشي.

دا اسمبلۍ د شمالي کوریا هغه پارلمان دی، چې عموماً د دولت تګلارې په رسمي توګه تصویبوي، معمولاً د واکمن کارګر ګوند له کانګرس وروسته غونډې کوي، څو د ګوند پرېکړې په قانون بدلې کړي.

د راپور له‌مخې، په یاده غونډه کې به د دغه هېواد هغه پنځه کلن اقتصادي پلان هم وڅېړل شي، چې په فبرورۍ میاشت کې د ګوند په نهم کانګرس کې اعلان شوی وو.

تمه وه چې په متحده عربي اماراتو کې د اوکراین، روسیې او امریکا ترمنځ د جګړې د پای ته رسولو په موخه مذاکرات وشي، خو دغه خبرې اترې د روسي پلاوي له ګډون پرته یوازې د اوکراین او امریکا د استازو ترمنځ ترسره شوې دي.

د دغو دوه ورځنیو مذاکراتو له پای ته رسېدو وروسته، د اوکراین ولسمشر ولادیمیر زېلېنسکي وویل، چې دمګړی د واشنګټن ټول تمرکز د ایران او سیمې پر وضعیت دی، خو ټینګار یې وکړ چې د اوکراین جګړه هم باید پای ته ورسېږي.

نوموړي ویلي، چې له مذاکراتو داسې ښکاري چې له روسیې سره به تبادله ترسره شي.

زېلېنسکي زیاته کړې: «داسې نښې شته چې د جنګي بندیانو نوې تبادله به ترسره شي، چې دا به په حقیقت کې یو ډېر ښه خبر او د دې پخلی وي چې ډیپلوماسي کار ورکوي. موږ هیله لرو چې دا هڅې پایله ورکړي».

نوموړي تر دې وړاندې پر خپلو متحدینو غږ کړی و، چې پر روسیې د بندیزونو فشار وساتي او د روسیې د تېلو پر ټانکرونو سخت ګامونه پورته کړي، تر څو مسکو د تېلو له عوایدو بې‌برخې شي.

عمران خان د یکشنبې په ورځ (د وري ۲مه) په خپله اېکس‌پاڼه لیکلي: «د دې هېواد [پاکستان] قاضیان باید پر خپل ځان وشرمېږي. موږ څو ځلي عدلیې ته مخه کړې، خو هغوی خپل روح د خپلو شخصي امتیازاتو په بدل کې پلورلی دی. هغوی خپل صداقت هم پلورلی دی».

خان زیاته کړې، قاضیان پوهېږي چې ماتولی یې نه‌شي، نو پرې د فشار راوړلو لپاره یې مېرمن په ۲۴ ساعته ډول په یوازېتوب کې ساتي او په باور یې دغه چاره هم د همدې قاضیانو په اجازه ترسره کېږي.

عمران چې ځان په غیرقانوني ډول زنداني شوی پخوانی لومړی وزیر ګڼي له اډیالې زندان څخه خپلو زامنو ته په ټیلیفوني خبرو کې څرګنده کړې: «هغوی [قاضیان] څنګه له بُشرا بي‌بي سره د داسې غیرانساني چلند اجازه ورکولی شي، یوازې د دې لپاره چې پر ما فشار راوړي. هغه [بُشرا بي‌بي] په ۲۴ ساعتونو کې ټول وخت په یوازېتوب کې تېروي».

خان زیاتوي، ټاکل شوې په اوونۍ کې یو ځلي له خپلې مېرمنې بُشرا بي‌بي سره د ۳۰ دقیقو لپاره وګوري، خو په وینا یې ډېری اوونۍ دغه پرېکړه هم نه‌عملي کېږي.

د نوموړي په باور، په اسلام کې پر ښځو، ماشومانو او زړو ظلم کول ناروا دي او په وینا یې، د قاضیانو موخې ښکاره دي او دوی په یوې ټولنه کې د عدالت مسوول دي. هغه زیاتوي: «هغوی [قاضیان] باید پر خپل ځان وشرمېږي».

ټيډرس ادهانوم د یکشنبې په ورځ (د وري ۲مه) په خپله اېکس‌پاڼه ویلي، په منځني ختیځ کې جګړه یوه خطرناک پړاو ته رسېدلې او په وینا یې داسې راپورونه ورکړل شوي، چې په ایران کې د نطنز د غني کولو پر مرکز او د اسراییل په دیمونا ښار کې چې اټومي تاسیسات په‌کې موقعیت لري، بریدونه شوي دي.

د اټومي انرژۍ نړۍوال اژانس د هغو پېښو په اړه څېړنه کوي، چې پرون د ایران په سوېل ختیځ او د اسراییل په دیمونا ښار کې راپور شوې وې. تر اوسه له ساحې بهر د غېر نورمال یا لوړې وړانګې د کچې هېڅ نښې نه‌دي لیدل شوي.

د روغتیا نړۍوال سازمان مشر زیاتوي: «پر اټومي سایټونو بریدونه د عامې روغتیا او چاپېریالي خوندیتوب لپاره مخ په زیاتېدونکي ګواښونه رامنځته کوي».

هغه وايي، د ایران، امریکا او اسراییل تر منځ د جګړې له پیل راهیسې د اټومي پیښې په صورت کې د عامې روغتیا له ګواښونو سره په اغېزناکه توګه د مبارزې په موخه د روغتیا نړۍوال سازمان په ۱۳ هېوادونو کې خپلو کارمندانو او د ملګرو ملتونو کارکوونکو ته لازمې روزنې ورکړې دي.

نوموړي د خپل پیغام په پای کې ویلي: «زه له ټولو خواوو په کلکه غوښتنه کوم چې تر ټولو زیاته نظامي زغم وښیې او له هر هغه اقدام څخه ډډه وکړي چې د اټومي پېښو لامل کېدای شي. مشران باید د کړکېچ کمولو ته لومړیتوب ورکړي او د ملکي وګړو ساتنه وکړي».

د روغتیا د نړۍوال سازمان د مشر دغه څرګندونې په داسې حال کې دي، چې له شاوخوا درېیو اوونیو راهیسې د ایران، امریکا او اسراییل تر منځ جګړه روانه ده.