کرملین وايي اروپا غواړي د اوکراین او روسیې جګړه دوام پيدا کړي
د کرملین ویاند دیمیتري پسکوف د اروپایي چارواکو پر څرګندونو نیوکه کړې او وایي چې اروپایان لا هم غواړي د اوکراین او روسیې جګړه دوام ومومي. هغه وویل چې اروپا نه پوهېږي څنګه د دې جګړې لګښتونه ورکړي. نوموړي ادعا وکړه چې اروپایي ټولنه په یوه ستونزمن حالت کې ده.
د اوکراین ولسمشر ولادیمیر زیلنسکي مخکې ویلي وو، چې«پوتین خپلو موخو ته نه دی رسېدلی. هغه ونه توانېد چې د اوکراین خلک مات کړي او دا جګړه یې نه ده ګټلې.»
په داسې حال کې چې د امریکا پوځي مرستې اوکراین ته نږدې درېدلې دي، خو نورو لوېدیځو هېوادونو اعلان کړی چې له کییف سره به خپلو مالي، پوځي او سیاسي مرستو ته دوام ورکړي.
د اوکراین جګړه، چې د ۲۰۲۲ کال د فبرورۍ په ۲۴مه پیل شوې، لا هم روانه ده او د دې هېواد په ختیځ کې جګړې دوام لري. دا جګړه چې د دویمې نړیوالې جګړې راهیسې د اروپا تر ټولو خونړۍ نښته بلل کېږي تر اوسه یې د دواړو لورو ځواکونو کې سلګونه زره کسان مړه او ټپیان کړي دي.
لسګونه زره اوکرایني ملکي وګړي هم د توغندیو او بېپیلوټه الوتکو په بریدونو کې خپل ژوند له لاسه ورکړی دی.
د امریکا په منځګړیتوب د سولې خبرې اترې هم د ځمکې د لیږد په مسله په ځانګړې توګه د دونیتسک په سیمه کې په ټپه دریدلي دي.
