د کولمبیا په سوېل کې د یوې پوځي الوتکې غورځېدو پېښه کې ۸ تنه مړه او لسګونه نور ټپیان شوي
د کولمبیا په سوېل کې د یوې پوځي الوتکې د غورځېدو له امله ۸ کسان مړه او ۸۳ نور ټپیان شوي دي. چارواکي وایي، د پېښې اصلي لامل تر اوسه نه دی روښانه شوی. دا الوتکه چې د "سي-۱۳۰ هرکولس" ډوله وه، د پوتومایو ولایت کې د الوتنې پر مهال لوېدلې ده.
د کولمبیا دفاع وزیر جان پېدرو سانچز وایي، د الوتکې د غورځېدو علت لا هم نه دی معلوم او تر دې دمه داسې هېڅ نښه نه ده لیدل شوې، چې دا پېښه دې د کومو وسلهوالو یا جرمي ډلو د برید پایله وي. هغه زیاته کړې، چې الوتکه د الوتنې لپاره په ښه تخنیکي حالت کې وه او عملې یې هم لازمې وړتیاوې لرلې.
د کولمبیا د هوايي ځواک قوماندان کارلوس سیلوا ویلي، چې په دې الوتکه کې ۱۱۴ مساپر او ۱۱ تنه عمله سپاره وو. د پوتومایو والي په وینا، له مساپرو څخه دوه تنه د پولیسو افسران وو او پاتې ۱۱۲ تنه نور پوځیان وو.
سياېناېن راپور ورکړی، هغه ویډیو یې ارزولې چې د پېښې ځای پهکې تثبیت شوی دی. دا ویډیو ښيي، چې د سي-۱۳۰ هرکولس الوتکه د کاوکایا له هوايي ډګر څخه پورته شوه، خو وروسته د یوې کلیوالې سیمې پر سر ورو ورو خپله لوړه ارتفاع له لاسه ورکړه. د انځورونو لهمخې، الوتکه له هوايي ډګر څخه تر دوو میلو هم کم واټن کې ولوېده.
د پېښې له ځایه اخیستل شوي انځورونه ښيي، چې له دړې وړې شوې الوتکې څخه توره لوخړه او د اور لمبې پورته کېدې.
د سي-۱۳۰ ډوله بار وړونکې الوتکې په نړۍ کې په پراخه کچه کارېږي او دا وړتیا لري، چې په لېرې پرتو سیمو او سختو شرایطو کې هم فعالیت وکړي.
