په پکتیا کې امنیتي سرچینو افغانستان انټرنشنل - پښتو ته وویل، چې سږکال په کوچني اختر کې طالبانو د پکتیا په ځاځي اریوب ولسوالۍ کې «منډهېر پارک» ته د سېلانیانو پر ورتګ بندیز لګولی و. دا پرېکړه د طالبانو او پاکستان ترمنځ له جګړو وروسته شوې او دا سیمه ډیورنډ کرښې ته څېرمه پرته ده.
د طالبانو تر واک لاندې ملي ټلوېزیون په تېر لوي اختر کې خبر ورکړی و، چې د لوی اختر په ورځو کې د پکتیا ولایت اړوند د ځاځي اریوب تفریحي پارک ته ۴۰۰زره سېلانیان ورغلي وو.
د ځاځي اریوب د تفریحي پارک مسوولینو د کوچني اختر په ورځو کې د ځاځي اریوب تفریح ځای هېڅ کوم انځور نه دی خپور کړی او نه یې هم د خپلو فعالیتونو په اړه څه ویلي دي.
طالبانو او پاکستان د تېرې چهارشنبې په ورځ اعلان وکړ، چې دوی به د سعودي عربستان، قطر او ترکیې په غوښتنه په لنډمهالي ډول جګړه ودروي. له دې سره دواړه خواوو اعلان وکړ، که ګواښ یا برید وشي؛ نو د بل لوري د کړنو ځواب به ورکړي.
له دې وړاندې بیا هم نړیوالو بنسټونو راپورونه خپره کړي دي، چې د طالبانو او پاکستان ترمنځ جګړو کې شاوخوا سل زره کورنۍ له خپلو مېنو څخه بېځایه شوي دي.
