په جنوبي وزیرستان کې د یوه سیمه ییز قومي مشر د کورنۍ درې غړي وژل شوي
د خیبر پښتونخوا ایالت د جنوبي وزیرستان ولسوالۍ د اعظم ورسک په کالوشه سیمه کې ناڅرګندو وسلهوالو د ملک سردار علي د کورنۍ د غړو پر موټر برید کړی، چې له امله یې د یوه افغان په ګډون درې تنه وژل شوي او درې نور ژوبل دي.
د سیمهییزو سرچینو په وینا، برید هغه مهال وشو چې د یادې کورنۍ غړي په موټر کې روان وو.
ټپیان د درملنې لپاره نږدې روغتون ته لېږدول شوي دي.
سیمه ییز خبریال لعل وزیر افغانستان انټرنشنل ته وویل چې ملک سردار علی په قام زلي خیل دی او جنوبي وزیر ستان د سوداګرو اتحادیې مشر هم پاتی شوی. په برید کې وژل شوی افغان د مل سردار علي ساتونکی بلل شوی.
کالوشه چې په ۲۰۰۳ او ۲۰۰۷ کلونو کې د ازبک جنګیالیو مرکز و، د پاکستاني طالبانو د پخواني مشر نیک محمد وزیر ټاټوبی ګڼل کیږي.
په وروستیو کې په شمالي او سویلي وزیرستان کې ورته پېښې زیاتې شوې دي، چې زیاتره قربانیان یې ملکي وګړي وي.
د سیمې اوسېدونکي وايي چې د امنیتي وضعیت د خرابېدو له امله اندېښمن دي او ادعا کوي چې موجوده اداره د امنیت په ټینګښت کې پاتې راغلې ده.
تر اوسه د برید مسوولیت کومې ډلې پر غاړه نه دی اخیستی.
