مایا ساندو: د اوکراین پر انرژۍ زیربناوو د روسیې بریدونه جنګي جنایت دی
د مالدووا ولسمشرېمایا ساندوویلي، چې د اوکراین د ملکي انرژۍ پر بنسټیزو تاسیساتو د روسیې بریدونه «جنګي جنایت» دی او ټینګار یې کړی چې دغو بریدونو د مالدووا د برېښنا مهمه نښلونکې کرښه له اروپا سره پرې کړې او وضعیت لا هم نازک دی.
مایا ساندو په خپل ایکس پوسټ کې ویلي، چې د شپې له خوا د روسیې بریدونو نه یوازې اوکراین ته زیان رسولی، بلکې د سیمې پر نورو هېوادونو یې هم مستقیم اغېز کړی دی.
نوموړې ویلي: «د اوکراین د ملکي انرژۍ پر زیربناوو د روسیې بریدونه جنګي جنایت دی او دا پر موږ ټولو برید دی.»
د هغې په وینا، د دغو بریدونو له امله د مالدووا هغه مهمه برېښنايي اړیکه چې له اروپا سره یې نښلوله، پرې شوې ده.
ساندو زیاته کړې، که څه هم بدیلې لارې برابرې شوې دي، خو وضعیت لا هم نازک پاتې دی او هر وخت د خرابېدو احتمال لري.
د مالدووا ولسمشرې ټینګار کړی چې د روان وضعیت بشپړ مسوولیت د روسیې پر غاړه دی.
