ازادې اروپا/ازادۍ راډیو اعلان کړی، چې د خپلو دوو څانګو فعالیتونه چې پهکې د خېبر پښتونخوا لپاره د پښتو ژبې "مشال راډیو" او د مقدونیې څانګه شاملې دي، د روانې مارچ میاشتې تر پایه بندوي. د دوی په خبره، دا پرېکړه د بودجې د محدودیتونو او د سرچینو د کمښت له امله شوې ده.
د ازادې اروپا/ازادۍ راډیو عمومي رییس سټیو کاپوس ویلي: «د دې دوو څانګو تړل کېدل د هغو اورېدونکو لپاره یو لوی زیان دی چې ترې ګټه اخلي. خو د ازادې اروپا/ازادۍ راډیو اوسنی مالي وضعیت موږ اړ باسي چې د خپلو سرچینو د وېش په اړه له سره غور وکړو».
هغه زیاته کړې، چې دا پرېکړه د دغو دواړو څانګو د ټیمونو د هڅو، کار او د هغوی د لوړو مسلکي معیارونو په ژورې ارزونې سره شوې ده.
مشال راډیو په وروستیو کلونو کې په پښتو ژبه پر ډیورنډ کرښه د قبایلي سیمو اړوند موضوعات تر پوښښ لاندې راوستي او د دغو سیمو د خلکو لپاره د مهمو او باور وړ خبرونو له سرچینو څخه ګڼل کېده. د دې رسنۍ تړل کېدل کېدای شي په دغو سیمو کې خپلواکو معلوماتو ته د لاسرسي پر کچې اغېز وکړي.
یاده رسنۍ چې د امریکا له لوري یې مالي لګښت ورکول کېده، په پاکستان کې یې خپرونې تر سختو بندیزونو لاندې وې او ان څو ځله یې خبریالانو باندې محدودیتونه هم لګول شوي دي. همداراز د یادې راډیو وېبسایټ هم په پاکستان کې تړل شوی و.
