اسلاماباد د امریکا او ایران احتمالي خبرو کوربه توب ته لېوالتیا ښودلې
د پاکستان لومړي وزیر شهباز شریف د سې شنبې په ورځ خبر ورکړ، چې هېواد یې د منځني ختیځ جګړې د پای ته رسولو لپاره د روانو خبرو اترو هرکلی کوي او په بشپړ ډول یې ملاتړ کوي. هغه ټینګار کړی چې د دې هڅو موخه د سیمې او وراخوا د سولې او ثبات ساتل دي.
شهباز شریف څرګنده کړې چې که امریکا او ایران هم په دې خبرو کې موافقه وکړي، پاکستان چمتو دی او ویاړ لري چې د روانې شخړې د جامع حل لپاره د معنا لرونکو او پرېکړه کوونکو خبرو کوربه وي.
د راپور له مخې، د امریکا ځانګړي استازي سټیو ویتکوف او د ایران د بهرنیو چارو وزیر عباس عراقچي ترمنځ پیغامونه د مصر، پاکستان او ترکیې له لارې تبادله کېږي. دوی هڅه کوي چې د مستقیمو مذاکراتو پر ځای لومړی د باور فضا رامنځته کړي او د دواړو لورو ترمنځ د بېلابېلو اختلافاتو د حل لپاره بنسټیزه زمینه برابره کړي.
سرچینې وايي چې د سولې لپاره د راتلونکو خبرو امکان شته چې په اسلاماباد کې ترسره شي، خو لا تر اوسه د دې خبرو لپاره کومه رسمي نېټه نه ده اعلان شوې.
یوې پاکستاني حکومتي سرچینې رویټرز ته ویلي، د ممکنه غونډې په اړه خبرې ډېرې پر مخ تللې دي، خو ټینګار یې کړی چې لا هم د ترسره کېدو په اړه "لوی شک" شته. د سرچینې په وینا، که خبرې ترسره شي، امکان لري د یوې اونۍ په موده کې وشي.
