ملګرو ملتونو کې د اوکراین سفیر: داسې شواهد شته چې روسیه ایران ته بېپیلوټه الوتکې ورکوي
په ملګرو ملتونو کې د اوکراین سفیر دې ته په اشارې سره چې له روسیې څخه ایران ته د بېپیلوټه الوتکو د لېږد په اړه کافي شواهد موجود دي، خبرداری ورکړ چې د منځني ختیځ د جګړو په ترڅ کې د روسیې او د ایران د حکومت ترمنځ پوځي همکاري «نړۍوال امنیت ته یو ستر ګواښ» بلل کېږي.
د اسوشېټېډ پرېس د راپور لهمخې، اندري ملنیک د دوشنبې په ورځ (د وري ۳مه) د ملګرو ملتونو امنیت شورا ته وویل، روسیه په سیمه کې د امریکا د پوځي شتمنیو د په نښه کولو په موخه له ایران سره د سپوږمکۍ انځورونو او نورو ډیټا په ګډون استخباراتي مرسته کوي.
هغه همدارنګه وویل، داسې کافي شواهد شته چې ښيي روسیه چې اوس مهال د ایراني ډیزاین پر بنسټ د "شاهد" ډرون الوتکو پرمختللې بڼه تولیدوي، دغه بریدګر ډرون ایران ته استوي.
نوموړي له متحده ایالاتو او نړۍوالې ټولنې وغوښتل، چې دغه ګواښ جدي وګڼي او زیاته یې کړه چې د روسیې لهخوا د ډرون الوتکو چمتو کول ایراني حکومت ته دا وړتیا ورکوي چې په ټول منځني ختیځ کې خپلو اهدافو ته د بریدونو لړۍ جاري وساتي.
