په ملګرو ملتونو کې د هرمز تنګي په اړه د بحرین وړاندیز له مخالفت سره مخ شو
هغه پرېکړهلیک چې د بحرین لهخوا د ملګرو ملتونو امنیت شورا ته وړاندې شوی او د هرمز تنګي د پرانیستې ساتلو لپاره یې د «ټولو اړینو وسیلو» د کارولو غوښتنه کړې، د ځینو هېوادونو له مخالفت سره مخ شو.
اسوشېټېډ پرېس خبري اژانس د چهارشنبې په سهار د وري په ۵مه د دې پرېکړهلیک یوې نسخې ته د لاسرسي په اعلانولو سره لیکلي، چې دا طرحه هېوادونو یا سمندري اېتلافونو ته اجازه ورکوي، ترڅو له دې حیاتي لارې د تګراتګ د امنیت تامین لپاره له نظامي اقدام څخه کار واخلي او همدارنګه له اسلامي جمهوري دولت څخه غواړي، چې پر سوداګریزو کښتیو بریدونه سمدستي ودروي.
دا په داسې حال کې ده، چې په هرمز تنګي کې د کړکېچ زیاتوالي د سون توکو بیې لوړې کړې دي او پر نړۍوال اقتصاد یې د هغې د اغېز په اړه اندېښنې راپارولې دي.
ډیپلوماتانو دغه خبري اژانس ته ویلي، چې دا پرېکړهلیک د ملګرو ملتونو د منشور د اووم څپرکي لاندې د هغې د راوستلو په اړه د ځینو هېوادونو له اندېښنو وروسته تر بیا کتنې لاندې دی. د ملګرو ملتونو د منشور اووم څپرکی امنیت شورا ته دا واک ورکوي، چې د سولې پر وړاندې د ګواښ، د سولې د نقض یا پر ځمکنۍ بشپړتیا د تېري په صورت کې د نړۍوالې سولې او امنیت د ساتلو یا بېرته راګرځولو لپاره لازمي اقدامات ترسره کړي.
