د ایپياېل ستره بولۍ؛ د رایل چلنجرز بنګلور کرېکټ لوبډله په ۱.۷۸ میلیارده ډالرو وپلورل شوه
د رویټرز خبري اژانس د راپور لهمخې، د هند د کرېکټ غوره لیګ (ایپياېل) د رایل چلنجرز بنګلور لوبډله څو سترو شرکتونو پېرلې ده. په دې شرکتونو کې ادیتیا بیرلا ګروپ، د ټایمز اف انډیا ګروپ، بولټ ونچرز او بلکسټون شامل دي.
د یادې لوبډلې پخواني مالک یونایټډ سپیریټس شرکت د دې کلب د امتیاز د پلور پرېکړه کړې او خپل مالکیت یې بل لوري ته لېږدولی دی.
د هند د کرېکټ غوره لیګ (ایپياېل) لوبډلو ته د پانګهوالو لېوالتیا د دې لیګ د عوایدو د چټک زیاتوالي او بېساري ارزښتموندنې له امله ډېره شوې ده. د پانګونې بانک هولیهان لوکي د معلوماتو لهمخې، د دې لیګ ټولییز ارزښت تېر کال ۱۸.۵ میلیارده ډالرو ته رسېدلی دی.
د دې هوکړې پر بنسټ، اریامان ویکرام بیرلا د یادې لوبډلې د رییس په توګه ټاکل شوی او ساتیان ګجواني د ټایمزاف انډیا ګروپ له لوري د مرستیال رییس دنده پر غاړه لري.
