د طالبانو هوايي چلند وزارت: ۱۰ نړیوال هوايي شرکتونه افغانستان ته منظمې الوتنې کوي
د طالبانو د ټرانسپورټ او هوايي چلند وزارت وایي، د یاد وزارت د هڅو او همغږیو په پایله کې اوس مهال ۱۰ نړیوال او دوه کورني هوايي شرکتونه د افغانستان نړیوالو هوايي ډګرونو ته منظمې الوتنې کوي.
د وزارت په وینا، یادې الوتنې د کابل، کندهار، هرات او مزار شریف له نړیوالو هوايي ډګرونو څخه کېږي او د مسافرو ترڅنګ د سوداګریزو توکو د لېږد رالېږد اسانتیاوې هم برابروي.
طالب چارواکي زیاتوي، چې د هوايي خدماتو زیاتوالی به پر سوداګرۍ، سیاحت او اقتصادي ودې مثبت اغېز ولري.
په همدې حال کې، څو موده وړاندي د متحده عربي اماراتو د اتحاد هوايي شرکت اجرایي رییس، انتون والدو نیوس ویلي وو چې کابل ته یې الوتنې پیل شوې دي او یاد شرکت غواړي سیمهییزو بازارونو ته لاسرسی پراخ کړي.
د طالبانو د ټرانسپورټ او هوايي چلند وزارت زیاته کړې چې اوس مهال په ټول هېواد کې ۵ نړیوال او ۲۲ سیمه ییز هوايي ډګرونه فعال دي.
