د بښنې نړۍوال سازمان: ټرمپ دې د ایران د برېښنايي بنسټونو له ګواښونو لاس واخلي
د بښنې نړۍوال سازمان د امریکا د ولسمشر ډونالډ ټرمپ وروستۍ څرګندونې په کلکه غندلې دي، هغه څرګندونې چې پهکې ویل شوي وو، متحده ایالات به د ایران د برېښناکوټونو او انرژۍ اړوند زېربناوو د ویجاړولو پلان د پنځو ورځو لپاره وځنډوي، څو د «دوښمنیو د حل» په اړه د خبرو اترو پرمختګ روښانه شي.
د بښنې نړۍوال سازمان په وینا، د داسې بریدونو نه ترسره کول باید د نړۍوال بشردوستانه قانون پر بنسټ د ملکي وګړو د ساتنې له اصل سره سم وي، نه دا چې د سیاسي خبرو اترو له پایلو سره وتړل شي.
د یاد سازمان د څېړنو مشره اریکه ګیواراروساس ویلي، چې د ټرمپ ګواښونه «خطرناک، بېپروا او د میلیونونو ملکیانو د ژوند او هوساینې لپاره جدي ګواښ دي».
هغې زیاته کړه، چې قصدي بریدونه پر ملکي بنسټونو لکه د برېښنا بټیو چې د خلکو د اساسي اړتیاوو د پوره کولو لپاره حیاتي ارزښت لري، کېدای شي د جګړې جنایت وګرځي.
سازمان خبرداری ورکړی، چې که د یوه هېواد برېښنايي سیستم له منځه ولاړ شي، نو په پراخه کچه ستونزې به رامنځته شي.
د بښنې نړۍوال سازمان یوازې امریکا نه ده غندلې، بلکې د ایران له حکومته یې هم غوښتنه کړې، چې د سیمې د انرژۍ بنسټونو او سوداګریزو کښتیو د په نښه کولو ګواښونه بند کړي.
