په ایران کې د امریکا د احتمالي ځمکنیو عملیاتو په اړه اټکلونه زیات شوي دي
په داسې حال کې چې د متحده ایالاتو او د ایران د حکومت ترمنځ کړکېچ په ډېرېدو دی، په ایران کې د امریکا د احتمالي ځمکنیو عملیاتو د ارزونې یا ان پلان جوړونې نښانو په واشنګټن کې د ځینو قانون جوړونکو اندېښنې راپارولې دي.
د راپورونو لهمخې، ځینو امریکايي قانون جوړونکو له پټو توجیهي غونډو وروسته د ځمکنیو ځواکونو د استولو د احتمال په اړه خبرداری ورکړی دی. د کانګرس جمهوري غوښتونکې استازې نانسي میس اعلان کړی، چې «په هېڅ صورت به د ایران په خاوره کې د امریکايي ځواکونو د شتون ملاتړ ونهکړي»، دا هغه دریځ دی چې پهخپله د جمهوري غوښتونکو ترمنځ د نظر اختلاف ښيي.
ورته مهال، ډیموکرات سناتور ریچارډ بلومنټال ویلي چې تر بل هر وخت د ځمکنیو عملیاتو لور ته د خوځښت په اړه ډېر اندېښمن دی او ټینګار یې کړی، چې د امریکا د اعلان شویو موخو ترلاسه کول به په ایران کې له «فزیکي شتون» پرته ستونزمن وي.
تر دې وړاندې داسې راپورونه هم خپاره شوي وو، چې د خارک ټاپو (د ایران د تېلو د صادراتو اصلي مرکز) د کنټرول په څېر سناریوګانې تر غور لاندې دي، چې په عمل کې یو ډول ځمکني یا نیمه ځمکني حضور ته اړتیا لري.
د رسنیو راپورونه او د ځینو استازو څرګندونې ښيي، چې د کانګرس د نظامي کمېټو د مشرانو په ګډونو یو شمېر کسانو د ځمکنیو عملیاتو د پلان جوړولو احتمال مطرح کړی دی. له دې سره سره، سپینې ماڼۍ په رسمي ډول اعلان کړی چې دا مهال د ځمکنیو ځواکونو د استولو کوم پلان نهلري، که څه هم ډونالډ ټرمپ دا انتخاب په بشپړ ډول نه دی رد کړی.
په تازه دریځ کې، د سپینې ماڼۍ ویاندې کارولین لیویټ اسلامي جمهوریت ته د هوکړې لپاره د ټرمپ پنځه ورځني فرصت ته په اشارې سره اعلان وکړ، چې «د ایران د رژیم پاتې شوني» له ډونالډ ټرمپ سره د همکارۍ یو بل فرصت هم لري. د هغې په وینا، دا فرصت په بشپړ ډول د اټومي پروګرام د پرېښودلو او د امریکا او د هغې د متحدینو پر وړاندې د ګواښونو د درولو په معنا دی.
لیویټ ټینګار وکړ، چې د امریکا د ولسمشر لومړیتوب «سوله» ده، خو خبرداری یې ورکړ چې د دغو شرایطو د نه منلو په صورت کې به د بریدونو لړۍ دوام وکړي او «بې ساري سخت ګوزارونه» به ورکړل شي. هغې همدارنګه وویل، چې ټرمپ تشې ډارونې نه کوي او سخت غبرګون ته چمتو دی.
د سپینې ماڼۍ ویاندې ټینګار وکړ، چې ایران د ناسمو محاسبو په پایله کې د خپلو نظامي وړتیاوو یوه برخه لکه لوړپوړي قوماندانان، سمندري ځواک، هوايي ځواک او دفاعي سیسټمونه له لاسه ورکړي او د کړکېچ دوام د دغه وضعیت له نه منلو څخه سرچینه اخلي.
دا په داسې حال کې ده، چې تېره اوونۍ ډونالډ ټرمپ د یوه پیغام په خپرولو سره اسلامي جمهوریت ته ۴۸ ساعته وخت ورکړی و، چې د هرمز تنګی په بشپړ ډول پرانیزي او ګواښ یې کړی و چې د دې غوښتنې د نه منلو په صورت کې به د ایران پر برېښناکوټونو نظامي بریدونه وکړي. د دغه مهلت له پای ته رسېدو څو ساعته وړاندې د امریکا ولسمشر د یوه بل پیغام په خپرولو سره له ایران سره د داسې مذاکراتو خبر ورکړ چې د هغه په وینا، د ایران حکومت لپاره له امریکا سره یوې هوکړې ته د رسېدو نوی فرصت دی. هغه د دې هوکړې لپاره پنځه ورځې وخت وټاکه.
که څه هم تر اوسه د ځمکنیو عملیاتو په اړه کومه رسمي پرېکړه نه ده اعلان شوې، خو په واشنګټن کې د دغو اټکلونو او اختلاف نظرونو زیاتوالی ښيي، چې دا انتخاب تر بل هر وخت ډېر د امریکا په ستراتیژیکو محاسباتو کې شامل شوی دی.
