ایران د امریکا «۱۵ ټکي وړاندیز» ته لا تراوسه مثبت ځواب نه دی ویلی
د ایران یوه لوړ پوړي چارواکي رویټرز ته ویلي، چې د جګړې د پای ته رسولو لپاره د امریکا وړاندیز ته د ایران لومړنی ځواب «مثبت نه دی». هغه ویلي، چې تهران لا هم دغه وړاندیز ارزوي. چارواکي وویل چې د تهران لومړنی ځواب پاکستان ته لېږل شوی څو واشنګټن ته ورسېږي.
خو د پاکستان یوه لوړ پوړي امنیتي چارواکي رویټرز ته ویلي، چې پاکستان د امریکا وړاندیز ایران ته رسولی، او اوس هم د تهران رسمي ځواب ته انتظار دی.
یوه لوړ پوړي ایرانی چارواکي مخکې منلې وه، چې تهران د پاکستان له لارې وړاندیز ترلاسه کړی او ویلي یې و چې که خبرې پرمخ ولاړې شي، نو د پاکستان یا ترکیې په کوم یو ځای کې کېدای شي.
