په هلمند کې د یوه کور چت پرېوتو پېښه کې درې کسه مړه او شپږ نور ټپیان شوي دي

د هلمند ولایت د سنګین ولسوالۍ په کارېز امانالله سیمه کې د سختو ورښتونو له امله د یوه کور چت پرېوتی، چې له امله یې د دوو ماشومانو په ګډون درې کسه مړه او شپږ نور ټپیان شوي دي. دغه پېښه نن سهار شاوخوا څلور بجې تر سختو ورښتونو وروسته شوې ده.
په هلمند کې د طالبانو ځایي چارواکي وایي، د پېښې ټپیان چې ډېری یې ښځې او ماشومان دي؛ د سنګین ولسوالۍ مرکزي روغتون ته د درملنې لپاره لېږدول شوي دي. د طالبانو ځایي چارواکو دارنګه خلکو ته د احتیاطي تدابیرو د نیولو سپارښتنه کړې ده.
