د منځني ختيځ د جګړې له امله په قطر او متحده عربي اماراتو کې د شکیرا کنسرټونه وځنډول شول
د قطر د ګرځندوی ادارې د سېشنبې په ورځ اعلان وکړ، چې د نړۍ د مشهورې سندرغاړې شکیرا کنسرټ چې ټاکل شوې وه د اپرېل په لومړۍ نېټه په دوحه کې ترسره شي، د «سیمې د اوسني حالت» له امله وځنډول شو.
همدارنګه په ابوظبي کې د موسیقۍ یو بل فیستیوال چې ټاکل شوې وه د شکیرا او د موسیقۍ د یوې ډلې په ګډون ترسره شي، هم بل وخت ته وځنډول شو. هغو کسانو ته چې مخکې یې ټکټونه اخیستي وو خبر ورکړل شوی، چې د دوی ټکټونه به په روان کال کې د نوي ټاکل شوي کنسرټ پر مهال هم اعتبار ولري.
شکیرا یوه مشهوره کولمبیايۍ سندرغاړې، سندرې لیکونکې او نڅاګره ده.
د راپورونو لهمخې، نور کنسرټونه لکه د اپرېل په ۱۰مه د هانس زیمر او د اپرېل په ۱۷مه د جان لېجنډ کنسرټونه به په قطر کې پر خپل وخت ترسره شي.
دا په داسې حال کې ده، چې ایران له اسراییل او امریکا سره د روانې جګړې په ترڅ کې د سیمې پر ځینو هېوادونو بېپیلوټه الوتکې او توغندي ویشتلي دي.
