اکسیوس د دوو اسراییلي سرچینو له قوله لیکلي، نتنیاهو اندېښنه لري چې ټرمپ به له تهران سره په احتمالي مذاکراتو کې داسې یوې هوکړې ته غاړه کېږدي چې د اسراییل له اهدافو سره واټن ولري، تهران ته به د پام وړ امتیازات ورکړي او د ایران پر وړاندې بریدونو کې به د اسراییل وړتیا محدوده کړي.
اکسیوس د چهارشنبې په سهار (د وري ۵مه) د یوې خبرې سرچینې له قوله لیکلي، چې اسراییلي چارواکي د امریکا پر هغې ادعا شک لري چې ګواکې اسلامي جمهوري دولت د ځینو امتیازاتو ورکولو وړاندیز کړی دی.
د دغې رسنۍ د راپور لهمخې، سټیو وېټکاف ټرمپ ته ویلي چې ایرانیانو په ځینو مهمو ټکو لکه د لوړې کچې بډایه شویو یورانیمو له زېرمو تېرېدلو سره موافقه کړې ده، که څه هم لا روښانه نه ده چې په تهران کې کوم باصلاحیته چارواکي دا وړاندیز کړی وي.
د اسراییلي چارواکو په نظر دا اندېښنه شتون لري، چې ټرمپ ښايي د خپلو غوښتنو د یوې برخې په بدل کې هم د هوکړې او جګړې د درولو پرېکړه وکړي او پاتې موارد پرته له کوم روښانه حل څخه راتلونکي ته وځنډوي.
امریکا اسراییل ته خبر ورکړی، چې اسلامي جمهوري دولت د ۴۵۰ کیلوګرامه ۶۰ سلنه بډایه شویو یورانیمو پر سپارلو، د ملګرو ملتونو لهخوا د اټومي تاسیساتو د جدي پلټنو پر منلو، د بالسټیک توغندیو د واټن پر محدودولو او د خپلو نیابتي ډلو له ملاتړ څخه پر شا کېدو موافقه کړې ده.
دوو باوري سرچینو اکسیوس ته ویلي، چې امریکا په روانه اوونۍ کې د خبرو اترو د پیل په اړه د ایراني چارواکو پرېکړې ته په تمه ده.
